Read Paite Chin SAM 51 Bible Online

SAM 51 - Paite Chin bible

SAM 51

¹Pathian aw, na chitna dungzui in hon hehpih inla; na lainatna thupi dungzui in ka tatleknate nulmang in.

²Ka thulimlouhnate hon silsiang vilvel inla, ka khelhna hon silsiangsak in.

³Ka tatleknate ka theigige ngal a: ka khelhna ka ma ah a om nilouhlouh hi.

⁴Na tung ah, na tung kia ah thil ka hihkhial a, na mitmuh in thil gilou ka na hihta hi: thu na gen a siamtang a na om theih a, vai na hawm a, gensiatbei a na om theihna ding in.

⁵Ngai in, thulimlouhna a suktuah in ka om a; ka nun khelhna in honpai hi.

⁶Ngai in, sunggil ah takna na deih naknak a, a kimu lou lam ah pilna n’on theisak ding hi.

⁷Hussop in hon siangsak inla, huchi in ka siang ding: honsil siang lechin, vuk sang in ka ngou zaw ding hi.

⁸Nopna leh kipahna bil in hon zasak in; na guh suktante a kipah theihna ding in.

⁹Ka khelhnate lak ah na mai sel inla, ka thulimlouhna tengteng nulmang in.

¹⁰Pathian aw, keimah ah lungtang siangthou tak siam inla; ka sung ah kha diktak siam thak nawn in.

¹¹Na kiang a kipan in hon paimang kenla; na Kha Siangthou hon laksak ken.

¹²Na hotdamna kipahna hon penawn inla; na Kha khut in honlen gige in.

¹³Huchi in talekte na lampi tungtang ka hilh ding a; huchi in mikhialte nang lam a nga nawn ding uhi.

¹⁴Pathian, hon hondampa Pathian aw, sisan suahte lak ah hon tankhia in; huchi in ka lei in na diktatna thu kipaktak in la in a sa ding hi.

¹⁵TOUPA aw, nang ka muk hong in; huchi in ka kam in na phatna a theisak ding hi.

¹⁶Kithoihna tung ah kipahna na nei ngal kei a; huchi hilou hileh ka pe ding a: haltum a thillat tung ah lungkimna himhim na neikei hi.

¹⁷Pathian deihlam kithoihnate zaw kha khasia ahi. Pathian aw, lungtang khasia leh kisik tuntun na musit kei ding hi.

¹⁸Na deihlam tak in Zion tung ah thil hoih hih inla; Jerusalem kulh lem in.

¹⁹Huchi in diktatna kithoihnate tung ah kipahna na neita ding a, haltum a thillat leh haltum a pumpiak tung ah: huchi in na maitam tung ah bawngtalte a lanta ding uh.