Read Paite Chin SAM 52 Bible Online

SAM 52 - Paite Chin bible

SAM 52

¹Mi hat aw, bang achia thil hihkhelh suang na hia! Pathian chitna tung a gitlouhna bangdia suang?

²Na lei in niteng in gilou salou a suangtuah nak; mulmet tem hiam tak khemhat bang in.

³Hoih sang in gilou na deih zaw a; diktatna thugen sang in zuau thugen na deih zaw hi. Selah

⁴Nang lei mi khemhat aw, thu mi valh zou theite na deih hi.

⁵Pathian in tangtawn a ding in a hon hihzou sam ding a, a honman ding a, na omna a kipan in a hon kaikhe ding a, mihing gam a kipan a hon botkhe ek ding hi. Selah

⁶Mi diktatte’n leng a mu un a lau ding ua, a nuihsan ding uh.

⁷En dih uh, hiai mi ahi, Pathian a kulhpi a nei nuamlou a a hauhna thupi muang zaw a, gitlouh satlouhna a ki hihhat, chi in.

⁸Kei zaw, Pathian inn a olive sel liahliah bang ka hi: Pathian chitna tangtawn tangtawn in ka muang ding hi.

⁹Huai na hih ziak in, tangtawn in kipahthu k’on hilh ding: na misiangthoute mitmuh ah na min ka ngak ding, a hoih ahi.