Read Paite Chin SAM 55 Bible Online

SAM 55 - Paite Chin bible

SAM 55

¹Pathian aw, ka thumna ah bil doh inla; hehpih ka ngetna ah kisel ken.

²Honza inla, hon dawng in: ka mangbat thu ziak in ka mau vialvial a, ka thum nilouhlouh hi.

³Melma husa in honhih mangbang; migilou salou nuaisiahna in a honvuk ua, heh in honsawi uhi.

⁴Ka sung ah ka lungtang a na mahmah a: sih mulkimnate’n hondelh khum hi.

⁵Lauthawnna leh linna in honbawm a, launa in a honkhuh khinta hi.

⁶Huan, ken, vakhu bang a kha neih ut hina tel ing e, aw! Huchi in ka leng mang ding a, khamuangtak in ka om ding.

⁷Ngai in, gamlapi ah ka vialvak dia, gamdai ah ka om ding hi. Selah

⁸Huih thupi leh huih bukna mun ah ka paikin ding, ka chi a.

⁹TOUPA aw, a lei uh hihsia in hihkek in; khopi ah ngongtatna leh kisuknatna ka mu ngal a.

¹⁰Sun leh zan in khopi kulh dawn ah a vialvak ua: asung ah thulimlouhna leh haksatna a om hi.

¹¹Gitlouh satlouhna asung ah a om a: nuaisiahna leh zekhemna in kholak a pawtsan ngeikei.

¹²Hon gensia lah melma ahi ngal kei a; hileh zaw, ka thuak theizaw ding: ka tung a kihihlian a honhua ahi sam kei a; hileh zaw, ka buksan ding hi.

¹³Himahleh, nang, ka mi batpih, ka lawm, kithuahpih theih na hi ngal a.

¹⁴Kam khum tak in i kihou khawm zel a, mipi lak a Pathian inn ah i pawt zel hi.

¹⁵Sihna a tung uah hongtung henla, kawhawm ah a hing in paisuk uhen: gitlouh satlouhnate a omna uah leh a gilsung uahte a om ngal a.

¹⁶Ken zaw Pathian ka sam ding a; TOUPA’N hon hondam ding hi.

¹⁷Nitaklam, zingsang, sun in ka mangbat thu ka gen in ka thum ding a, huchi in aman ka aw a ngaikhe ding hi.

¹⁸Ka tung a kidouna lak ah ka hinna khamuangtak in a humbit ta a: honsualte lah a tam ngal ua.

¹⁹Pathian, nidanglai a om gige in, a ngaikhe dia, amau a dawng ding. Selah Lamdanna nei ngeilou, Pathian laudan siam ngeilou mite zaw.

²⁰Amah toh kituakte tung ah a khut a lik a: a thukhun a hihbuahta hi.

²¹A kam nawitui khal bang in a nem a, a lungtang bel kidouna ahi ngal a; a thute sathau sang in a nalzaw a, himahleh namsau phawisate ahi.

²²Na puakgik TOUPA tung ah nga lechin, aman nang a hon hihhat ding hi. Mi diktat chikmah in leng a hihlin a phal kei ding hi.

²³Himahleh, Pathian aw, nang amaute manthatna kawhawm ah na paisuk sak ding; sisan suahhat leh khemhat mite tuh a damsung kimkhat uleng a dam zou kei ding uhi; ken bel nang k’on muang hi.