Read Paite Chin SAM 56 Bible Online

SAM 56 - Paite Chin bible

SAM 56

¹Pathian aw, hon hehpih in; mihing in hon valhkhit a tum uhi: nitum in honsual in hon nuaisiah uh.

²Ka melmate’n nitum in honvalh zoh a tum ua: kisatheitak a honsualte lah a tam ngal ua.

³Ka lau chiang in, nangmah k’on muang hi.

⁴Pathian ah a thu ka phat ding a; Pathian ka gingta a, ka lau kei ding; sa in bang a honchih thei dia!

⁵Nitum in ka thute a la kawi ua: a ngaihtuahna tengteng tuh ka hatlouhna ding lam ngen ahi.

⁶A kikhawm ua, a bu ua, ka khapte a chiamteh ua, ka hinna hihmang tum a a ngak ziak un.

⁷Thulimlouhna in a suahtak san ding uam! Pathian aw, heh in michih hihniam in.

⁸Nang ka vakvaihnate na chiamteh a: ka khituite na savun thawl ah thun in; na laibu ah a tuang chiat kei ua hia!

⁹K’on sap hun ngeingei in hondoute a taizak ding ua: hiai ka thei, Pathian in hon panpih hi.

¹⁰Pathian ah a thu ka phat ding a: TOUPA ah a thu ka phat ding hi.

¹¹Pathian ka gingta a, ka lau kei ding; mihing in bang a honchih thei dia!

¹²Pathian aw, na kiang ah thuchiam ka nei a: kipahthugen kikhopnate in ka honthuk ding hi.

¹³Ka hinna sihna lak ah na humbit a; ka khete puk lou ding in na humbit kei ahia! mihing vak a Pathian ma a ka vak theihna ding in.