Read Paite Chin SAM 57 Bible Online

SAM 57 - Paite Chin bible

SAM 57

¹Pathian aw, hon hehpih inla, hon hehpih in; ka hinna nangmah ah a hong puklut ngal a: ahi, na kha nuai ka tuh ding, vangtahnate a then masiah.

²Pathian Tungnungpen ka sam ding: Pathian kei dia bangkim hon hihsakpa.

³Hon valhkhit tumpan a hon gensiat hun chiang in aman van a kipan in a honsawl ding a, a hon hondam ding hi; Selah Pathian in a chitna leh a thutak a honsawl khe ding.

⁴Ka hinna humpinelkai lak ah a om a; mi mei a kang lak ah ka lum a, mihing tate lak ah; huaite ha tei leh thal ahi a, a lei uh namsau hiam tak ahi.

⁵Pathian aw, nang van khen pek ah pahtawi in hongom in! Na thupina leitung tengteng tung ah hongom hen!

⁶Ka khe awkna ding in len a phah ua; ka hinna a kun kheikhei a: ka ma ah kawkhuk a tou ua; amau mah a laitak ah a kia uhi. Selah

⁷Ka lungtang a kip ahi, Pathian aw, ka lungtang a kip ahi: la ka sa ding a, ahi, phatna la ka sa ding hi.

⁸Ka thupina, halh in; pekging leh kaihgingte aw, halh un: kei zingkhang in ka halh ding hi.

⁹TOUPA aw, michih lak ah nang kipahthu k’on hilh ding a: namchih lak ah nangmah phat in la ka sa ding hi.

¹⁰Na chitna vansun in a thupi a, na thutak vandum sun in a thupi ahi.

¹¹Pathian aw, nang van khen pek ah pahtawi in omta in; na thupina leitung tengteng ah hong omta hen.