Read Paite Chin SAM 58 Bible Online

SAM 58 - Paite Chin bible

SAM 58

¹Diktatna thu daidide in maw na gen taktak uh! Mihing tate aw, diktak in maw vai na hawm uh!

²Ahi, na lungtang uah thil thulimlou na hih nak ua; leitung ah na khut ua thil ngongtatna na buk khia uhi.

³Migilou saloute a nu uh gilsung a kipan in Pathian apan khen in a om ua: a piantak un zuau thugen in a vakmang zel uhi.

⁴A gu uh gul gu bang ahi a: thangtom bengngong a bil hum bang ahi uhi.

⁵Huai in gul aitawi aw a ngaikhe kei a, bangchibang a siam in bum mahle uh.

⁶Pathian aw, a kam uah hate tansak inla: TOUPA aw, humpinelkai hatsanlaite ha lianpipite tong khia in.

⁷Amau tui hattak a luang bang in tuimang uhenla: a thalte a a ngim in, sat tan bang in om zel hen.

⁸Dokdawn, tui a mang maimah zel bang hileh: a hunlou a numei nau neih, ni mel mu lou bang hi hen aw.

⁹Na belte un ling satna a theihma un leng aman pingpei in a lamang ding. A hinglai leh a kuanglai leng.

¹⁰Mi diktat in phulakna a muh in a kipak ding a: migilou salou sisan ah a khe a sil ding hi.

¹¹Huchi in mite’n, mi diktat ading in kipahman a omtaktak a: lei ah vaihawmpa Pathian a om taktak hi, a chi ding uhi.