Read Paite Chin SAM 59 Bible Online

SAM 59 - Paite Chin bible

SAM 59

¹Ka Pathian aw, hondoute apan hon humbit inla; honsualte apan kipan mun sang ah honsuan in.

²Thil hihkhialte apan hon humbit inla, sisan suah hatte apan hon hondam in.

³TOUPA aw, ka tatlekna ziak hilou in, ka khelh ziak leng hilou in, ngai in, ka hinna a tang gige hi, mi hatte honsual ding in a kikhawm uhi.

⁴Ka khelh louh pi in leng honsual ding in a kisa ua: hon panpih ding in kihihhalh inla, en in.

⁵TOUPA aw, sepaihte Pathian, Israelte Pathian, nangmah ngei namchih gawt ding in thou inla: milepchiah giloutakte peuhmah hawi ken. Selah

⁶Nitaklam in a hong nawn ua, ui bang in a ham vengvung ua, khopi a kimvel ah a pai uhi.

⁷Ngai in a kam un a sa-ik khia ua; a muk uah namsaute a om a: kua a thei a om a! A chi maimah uhi.

⁸Himahleh, TOUPA aw, nang amau na nuihsan zaw ding a; namchih na nuihsan ding hi.

⁹Ka hatna aw, k’on ngak nilouh a, Pathian ka insang ahi ngal a.

¹⁰Ka tung a migi Pathian in a hondon ding a: Pathian in ka melmate tung ah ka thudeih a hon musak ding hi.

¹¹Amau that kenla, huchilou in zaw ka mite’n a mangngilh kha ding ua: TOUPA aw, ka phaw pen uh, Na thilhihtheihna in hihdalh inla, hihniam in.

¹²A kam khelhna ziak un leh a muk ua thupawt ziak in a kisaktheihna ngei uah awk uhenla a thugen zel uh hamse lohna leh zuauthu ziak in leng.

¹³Amaute thangpai in hih mangthang inla, a om nawn louhna ding un hih mangthang inla, Pathian in Jakobte lak ah vai a hawm chih theichiat uhen, kawlmong pha in.

¹⁴Huan, nitaklam in hong uhenla, ui bang in ham vengvung uhenla, khopi a kimvel ah pai uhen.

¹⁵Amau nekding zong in a vakvak ding ua, a tai kei uleh a om zanhak ding uhi.

¹⁶Himahleh ken na hatna thu la in ka sa ding a; ahi, zingsang in na chitna thu nuamtak in la in ka sa ding hi: nang ka insang, ka mangbatni a ka kihumbitna na hi ngal a.

¹⁷Ka hatna aw, nang phat in la ka sa ding a; Pathian ka insang, ka tung a siam Pathian ahi ngal a.