Read Paite Chin SAM 60 Bible Online

SAM 60 - Paite Chin bible

SAM 60

¹Pathian aw, nang n’on khahkhia a, n’on hihsia a; n’ong hehta a; hon tungding nawn in aw.

²Hiai gam na hih ling a, na khangsakta hi: a khangkhamte siam hoih nawn inla; a ling a ling ngal a.

³Na mite thil haksa pipi na tuak sak a: hoina uain n’on dawnsak hi.

⁴Nang laudansiamte kiang ah puanzak na peta a, thutak ziak a zak a hihtheihna ding in. Selah

⁵Na deihtakte humbit a a om theihna ding un, na khut taklam in hondam inla, hon dawng in.

⁶Pathian in a siangthouna ah hichibang in a gen, Ka nuam ding a: Sekem khua ka hawm ding a, Sukkoth guam ka hawmzak ding hi.

⁷Gilead gam kei a ahi a, Manasseh gam kei a ahi a; Ephraim gam leng ka lu humbitna ahi a; Judah gam ka lalchiang ahi.

⁸Moab gam ka kisilna bel ahi; Edom gam ah khedap ka pai ding: Philistia gam, nang zaw keimah ziak in kikou tanla, chi in.

⁹Khopi kiptak ah kuan a hon pilut dia! Edom gam ah kuan a honpi ding!

¹⁰Pathian aw, nangmah mah in n’on deihlouh ka hi kei ua hia? Pathian aw, ka sepaihte kiang uah lah na pawt ngal takei a.

¹¹Melmate sual ding in hon panpih in, mihing panpihna bangmahlou maimai ahi ngal a.

¹²Pathian ziak in hangsantak in ka hih ding: amah tuh i melmate sikden dingpa ahi ngal a.