Read Paite Chin SAM 63 Bible Online

SAM 63 - Paite Chin bible

SAM 63

¹Pathian aw, nang ka Pathian na hi a; phalvak in k’on zong hi: ka hinna nangmah duh in a dangtak a, ka sa in a honngai ahi, gamkeu leh guam tui omlouhna ah.

²Huchi mah bang in Mun Siangthou ah k’on en gige hi, na thilhihtheihna leh na thupina mu ding in.

³Na chitna ka hinna sang a a hoihzawk ziak in ka muk in a honphat ding hi.

⁴Huchi mah bang in ka damsung teng in k’onphat ding a: na min in ka khutte ka zak ding hi.

⁵Ka hinna guhngek leh thau a a tai bang in a tai ding a; ka kam in kipahna mukpu in a honphat ding hi.

⁶Ka lupna tung a k’on theihgige lai in, zan a na tungtang thu ka lunggel lai in.

⁷Nang hon panpihpa na hi a, na kha nuai ah nuam in la ka sa ding hi.

⁸Ka hinna in honzui tettet a, na khut taklam in n’on kai zel hi.

⁹Ka hinna hihmang tum a zongte leimun nuainung ah a lut ding ua.

¹⁰Namsau thilhihtheihna in a puk ding ua: sehalte tan a hi ding uhi.

¹¹Kumpipa bel Pathian ah a nuam ding a: amah lou a kichiam peuhmah in a suang ding ua, zuauhat kamte hum a om ding a hih ziak in.