Read Paite Chin SAM 65 Bible Online

SAM 65 - Paite Chin bible

SAM 65

¹Pathian aw, Zion ah phatna in hon ngak nilouh hi: thuchiam na kiang ah tangtung sak in.

²Thumna zapa aw, na kiang ah sa tengteng a hongpai ding hi.

³Thulimlouhnate’n honzoh chiang in, ka tatleknate uh nang na silsiang hi.

⁴Mi, na biakin huangsung intual a om thei ding a na tel a, na kiang na naihsak in nuam a sa hi: na inn hoihna in ka tai ding ua, na biakin Mun Siangthou hoihna in.

⁵Pathian hon hondampa aw, diktatna mulkimhuai thilhihte in n’on dawng ding hi; nang kawlmong a mi tengteng leh tuipi tung a gamlapi a omte lametna na hi a.

⁶Thilhihtheihna a tai a kigak a, nangmah hatna a mualte hihkippa na hi hi.

⁷Tuipi thomging, a kihot gingte leh michih chiak vengvung hihdaipa na hi.

⁸Kawlmong tawp a omte’n leng na theihsaknate a lau ua: zingsang leh nitak paikhiaknate nuam in na kikou sak hi.

⁹Lei na veh a, tui in na khai a, nakpi petmah in na hih hoih hi; Pathian lui tui in a dim a: lei huchibang a na bawl nung in amau ding in buh na bawlsak hi.

¹⁰Leilehte tui tampi in na vak a; a saichian na khengsak hi: vuahtui in na nemsak a. A thilpoute na vualzawl zel.

¹¹Kum na hoihna na khusak a; na paina lam thil hoih in a tak hi.

¹²Gamdai a gantatna munte ah a tak a, tangte leng nuamna gak suak in a om hi.

¹³Gan tatna munte ganhon in a luahsuak a; phaizangte leng buh in a khuhsuak hi; nuam in a kikou ua, la a sa uhi.