Read Paite Chin SAM 68 Bible Online

SAM 68 - Paite Chin bible

SAM 68

¹Pathian thou in, a melmate delhzak hen: amah hawte leng a ma ah taikek uhen.

²Meikhu mutmang a a om bang in, amau mut mang in: khuainun mei lum a a zul bang in migilou saloute Pathian ma ah mangthang uhen.

³Mi diktatte bel kipaktak in om uhenla; Pathian ma ah nuam uhenla; ahi, kipaktak in nuam uhen.

⁴Pathian pahtawi in lasa unla, a min phat in lasa un: kangtalai a gamdaite paisuakna din lamlian ding sungvum unla: a min TOUPA ahi; a ma ah nuam un.

⁵Pathian a omna siangthou a om, pa beite Pa leh meithaite ngaihtuahpa ahi.

⁶Pathian in mi tangkhatte inkuan ah a pangsak a: mi hentate a pikhia a, vangphatna ah a pi lut hi: helhatte zaw gamkeu ah a om uhi.

⁷Pathian aw, na mite makai a na hongpawt a, gamdai a na paisuak lai in. Selah

⁸Lei a ling dupdup a, vante leng Pathian ma ah a takkhia a: Sinai tang hilhial leng Pathian ma ah, Israelte Pathian ma ah, a ling dupdup hi.

⁹Pathian aw, nang vuah tampi na zu sak a, na gouluah ding, a bah in, na hihkip hi.

¹⁰Na heute’n huai ah panmun a khoh ua: Pathian aw, nang na hoihna in gentheite ading inn na bawl hi.

¹¹TOUPA’N thu a pia a, tanchin genmi numeite pawl lianpi ahi uhi.

¹²Sepaihte kumpipate a taikek ua: inn ngaknu’n gallak sum a hawm hi.

¹³Vakhu kha dangkaeng a luan a, a kha mong leng dangkaeng tesel sel a luan bang in, belam huang kal bang ah om mahle uh.

¹⁴Bangkim hihthei in huai a kumpipate a hihzak lai, Zalmon tang a vukzuk lai bang ahi hi.

¹⁵Pathian tang Bashan tang ahi a; Bashan tang tuh tang sangpi ahi.

¹⁶Tang sangtakte aw, Pathian in a omna ding a a tang deih, bangdia haza a en. Ahi, TOUPA huai ah tangtawn in a om nilouh ding ahi.

¹⁷Pathian kangtalai a sing a sing, a sang a sang tampi ahi: TOUPA tuh, Sinai tang a om bang in, huai lak ah Mun Siangthou ah a omta hi.

¹⁸Nang tunglam ah na paitou a, matte sal in na pi a: mihingte apan thilpiakte na mu a, ahi, helhatte apan leng: TOUPA Pathian a kiang ua a om theihna ding in.

¹⁹TOUPA ka puak uh niteng a hon puak sakpa, hon hondampa Pathian phat in om hen. Selah

²⁰Pathian ei ading in kihumbitna Pathian ahi; sihna a kipan hotkhiaknate TOUPA Jehovah a ahi.

²¹Himahleh Pathian in amah melmate lu a sat phel ding a, gitlouhna a paizelte lu sam pha tak.

²²TOUPA’N, Bashan gam a kipan in ka pi nawn ding a tuipi nuai thuktak a pan ka pi nawn ding.

²³Na khe sisan a na diah theih a, na ui leite’n na doute lak a tan a neih theihna ding in a chi a.

²⁴Pathian aw, na pailaite a mu ua, i Pathian i kumpipa Mun Siangthou a a pailai

²⁵Nungak khuang bengte lak ah, lasa pawlte a pai masa ua, tumging tumpawl in a zui uhi.

²⁶Kikhopnate ah Pathian phat un, Israel tuinak a pawtte aw, TOUPA phat un.

²⁷Huai ah nautum Benjamin a vaihawmpa un a om chiuchiau, Judah miliante leh a upate uh, Zebulun miliante, Naphtali miliante toh.

²⁸Na Pathian in na thilhihtheihna a pia a: Pathian aw, kou ding a thil n’on hihsak hihhat in.

²⁹Jerusalem a na biakin ziak in Kumpipate’n kipahmante a honpuak ding uhi.

³⁰Dangkate sikden in sialluang lak a gamsahangte taihilh in; Bawngtal tampi, michih bawngnoute toh kidou ut mi khempeuh a hihzakta hi.

³¹Aigupta gam a kipan in miliante a hongpawt ding ua; Ethiopiate a khut uh Pathian lam a zak ding in a kintat ding uh.

³²Leitung gamte aw, Pathian pahtawi in lasa unla; aw, TOUPA phat in lasa un. Selah

³³Vante van nidanglai a omte tung a tuangpa mah. Ngai in, a aw a suah a, A aw thupitak mahmah ahi.

³⁴Pathian kiang ah hatna pia un: a thupina Israelte tung ah a om a, a hatna van dumte ah a om hi.

³⁵Pathian aw, na Mun Siangthou a kipan in na kihtakhuai ahi. Amah Israelte Pathian ngei in A mite kiang ah hatna leh thilhihtheihna a pia hi. Pathian phat in om hen.