Read Paite Chin SAM 69 Bible Online

SAM 69 - Paite Chin bible

SAM 69

¹Pathian aw, hon hondam in; tuite lah ka hinna pha in a lutta hi.

²Buannawi thukpi, siksan himhim om louhna ah, ka tum hulhul hi: Tui thukpi tui lian hon tupnate ah, ka na lutta hi.

³Ka kikouna lam in ka bah a; ka dang a keu khinta; ka Pathian ka ngakna ah ka mit a vai khinta hi.

⁴Bangmahlou a hon hawte ka samzang sang in a tam ua: dikloupi a hondou a hon hihmanthat tumte mihat tak ahi uhi: ka lak hetlouh ka penawn hi.

⁵Pathian aw, nang ka haidan na thei hi; ka siamlouhnate nang ah sel ahi kei hi.

⁶TOUPA aw, sepaihte Pathian, nangmah ngakte keimah ziak in zahlak kei uhen: Israelte Pathian aw, nangmah zongte keimah ziak in hihzum in omkei uhen.

⁷Nangmah ziak a gensiat ka thuak ziak in, zumnan ka mai a khuh khinta hi.

⁸Ka unaute lak ah mikhual ka na hita a, ka nu naute lak ah theih ngeilouh mi ka na hita hi.

⁹Na inn a ka phatuamngaihna in hon negai a; nangmah gensete gensiatnate ka tung ah kibung hi.

¹⁰Ka kah a, anngawl kawm a ka hinna ka sawi leh, huai gensiat a ka omna phet ahi.

¹¹Ka puansilh a saiip ka zat leh, amau dia hoihlou lam a gentehna ka na hi zel a.

¹²Kulh kong a tute’n ka tungtangthu a gen ua; zukhamhatte lasak ka hita hi.

¹³Himahleh, TOUPA aw, ken zaw, hun kipahhuai ah ahi, ka thum; Pathian aw, na chitna thupi ziak in na hotdamna thupitak in hon dawng in.

¹⁴Buannawi a kipan hon humbit inla, hontum sak mahmah ken; honhawte lak ah leh tui thukpi a kipan humbit in hon omsak in.

¹⁵Tui lian in hon tummang kei henla, tui thuk pi in leng honvalh kei hen, kawkhuk in leng a kam chihkhum kei hen.

¹⁶TOUPA aw, hon dawng in; na chitna a hoih ngal a; na lainatna thupidan bangzel in kei lam hong nga in.

¹⁷Na sikha lak ah na mai sel ken; ka mangbang ngal a; hon dawng meng in.

¹⁸Ka hinna honnaih in, tan inla; hondoute ziak in hon humbit in.

¹⁹Nang mi hon gensiatnate, ka zahlaknate, ka zumnate na thei hi: hondoute na ma ah a omvek uhi.

²⁰Mi hon gensiatna in ka khasia a; nakpitak in ka lungkham behlap hi: huchi in hon hehpih ding ka zong a, himahleh kuamah a om kei ua; hon khamuan ding ka zong nawn a, kuamah ka mu sam kei hi.

²¹Ka an ding in banghiam kha a honpiak behlap ngal ua; ka dangtak in uain thuk dawn ding in honpia uhi.

²²A ma ua a dohkan uh thang hi henla; khamuangtak a a omlai un pial suak hen.

²³A mitte uh, a muh theihlouhna ding un, hihmial in om hen; a kongte uh kivuang sak gige in.

²⁴Na lungkimlouh mahmahna a tung uah sungbua inla, na heh thangpaihna in amau man hen.

²⁵A omna uh gam henla; a puanin uah kuamah omkei hen.

²⁶Na satpa a sawi ua, na sukliamte lungkhamna leng a gen ngal nak uhi.

²⁷A thulimlouhna uah thulimlouhna behlap inla; amau na diktatna ah lut kei uhen.

²⁸A min uh hinna bu apan nulmang in om uhen, midiktat lak ah gelh hi kei uhen.

²⁹Himahleh kei genthei tak leh lungkham tak ka hi a: Pathian aw, na hotdamna in mun sang ah honkoih in.

³⁰Pathian min la in ka phat ding a, kipahthu gen in amah ka pahtawi ding hi.

³¹Huchibang in bawngtal hiam, ki leh chinnei bawngpa hiam, sang in TOUPA a kipaksak zaw ding hi.

³²Thunuailutte’n huai mu in a kipak uhi: nou Pathian zongte aw, na lungtang uh hing in om hen.

³³TOUPA’N tagahte ngaikhia in, a hentate tuh a musit ngal kei hi.

³⁴Lei leh van in amah phat hen, tuipite leh a sung ua thil tang thei peuhmahte toh.

³⁵Pathian in Zion honkhia in, Judah khuate a siam dek ngal a: huchi in huai ah a om ding ua, neih toh a thuah ding uh.

³⁶A sikhate suante’n gou a luah ding ua; a min itte a sung ah a om ding uhi.