Read Paite Chin SAM 7 Bible Online

SAM 7 - Paite Chin bible

SAM 7

¹TOUPA ka Pathian aw, nangmah ah ka ginna ka nga a: hondelh tengteng lak ah hon hondam in hon humbit in:

²Huchilou in zaw, humbitpa omlou in humpinelkai bang in, ka hinna a bot nen kha ding hi.

³TOUPA ka Pathian aw, huchibang a hih ka na hih a, ka khut a khelhna a om a,

⁴Ka lawm khelhna a thuk ka na hihleh, Ahi, bangmahlou a hondou ka humbit a na hi zaw:

⁵Melma in ka hinna delh in, delh pha mai hen aw; ahi, ka hinna lei ah chilpuk in, ka thupina leivui lak ah koihmai hen. Selah

⁶TOUPA aw, heh in thou inla, hondoute thangpaihna dou din kisa inla: kei a ding in kihihhalh inla; vaihawmna ding thu na peta hi;

⁷Huchi in michih kikhawm khawmte’n hon umsuak uhen: huan, nang a tung uah sangpi in kiknawn in;

⁸TOUPA’N michih vai a hawmsak hi: TOUPA aw, keimah a ka diktatna leh ka lungsim hoihna om bangzel in vai hon hawmsak in.

⁹Giloute gitlouhna hong tawpta leh aw, mi diktatte hihkip in: Pathian diktat in lungtangte leh lungsimte a enchian hi;

¹⁰Ka phaw Pathian kiang ah a om, amah zaw lungtang dikpu hondampa ahi;

¹¹Pathian vaihawmpa diktat ahi, ahi, ni teng in migiloute tung a lunghihlouhna nei Pathian ahi.

¹²Mi a kihei kik kei leh aman a namsau tat-hiam in; thalpeu a lai a, a manta hi;

¹³Sihna vanzatte amah thahna ding in leng a bawl dimdiam a; a thalte kuangthei in a bawl hi;

¹⁴En in, gitlouhna a zinpih; ahi, thilhihkhelhna a pai a, zuauthu a piangsakta hi;

¹⁵Kawkhuk a bawl a, thukpi in a tou a, amah khuk toh ah a keta hi;

¹⁶A thilhihkhelhna amah lutung mah ah a hongkik nawn ding, hiamgam tak a a thilhih amah sipmah ah a ke ding hi.

¹⁷TOUPA a diktatna ziak in, a kiang ah kipahthu ka gen ding: TOUPA tungnungpen min phat in la ka sa ding hi.