Read Paite Chin SAM 71 Bible Online

SAM 71 - Paite Chin bible

SAM 71

¹TOUPA aw, nangmah ah ka ginna ka koih zel hi; chikmah chiang in zahlak in hon omsak ken.

²Na diktatna vang in hon humbit in, hon honkhia inla: kei lam ah na bil hondoh in, hon hondam in.

³Kei ading in omna suangpi, ka hohtheih gige na, honghi in: nang hon hondam ding in thu na pia a; ka suangpi leh ka kulhpi na hi ngal a.

⁴Ka Pathian aw, migilou salou khut a kipan hon honkhia in, mi diktatlou leh nunsia khut a kipan.

⁵TOUPA Pathian aw, nang ka lamet na hi: ka naupan chik a kipan k’on muan na hi.

⁶Ka nu gil a kipan in nangmah na honlen zel a: ka nu sung a kipan hon lakhepa na hi: ahi nangmah ka honphat gige ding.

⁷Mitampi theih in thillamdang ka hi a; himahleh ka kihumbitna kiptak na hi.

⁸Ka kam nang phatna in a dim ding a, nitum in nang pahtawina in a dim ding hi.

⁹Ka tek chiang in hon nial kenla, ka bah chiang in hon paisan ken.

¹⁰Ka melmate’n ka tungthu a gen ua; ka hinna tangte leng a kikou uhi.

¹¹Pathian in a paisanta: delh unla, man un; humbitpa ding himhim a om ngal kei a chi in.

¹²Pathian aw, hon gamlat mahmah ken: ka Pathian aw, hon panpih ding in kin in.

¹³Ka hinna tung a melmate zahlak leh mangthang in om uhenla; ka siatna zongte gensiatna leh zumna a khuh in om uhen.

¹⁴Himahleh ken zaw ka lamen gige ding a, k’on phat semsem ding hi.

¹⁵Ka kam in na diktatna thu a gen ding a, nitum in na hotdamna thu a gen ding a: a tamdan ka thei ngal kei a.

¹⁶TOUPA Pathian thilhih thupiakte toh ka hongpai ding a: a diktatna, nangmah diktatna thu kia ka gen ding hi.

¹⁷Pathian aw, ka naupan chik a kipan nang n’on hilh a; tu tan in na thillamdang hihte ka theisak gige hi.

¹⁸Ahi, Pathian aw, ka tek a ka sam a kan hun in hon paisan mahmah ken; na hatna hiai khangte kiang leh, na thilhihtheihna khang hong omlai dingte kiang a ka theihsak mateng.

¹⁹Pathian aw, na diktatna leng a sang mahmah ahi; Pathian aw, nang thil thupitakte hihpa, nangmah bang kua a om?

²⁰Nang, buaina tampi leh thupitak hon musakpa’n n’on hingsak nawn dia, lei thukpi a kipan n’on pikhe nawn ding hi.

²¹Nang ka thupina honhih pungsak inla, hong kihei nawn inla, hon khamuan in.

²²Pekging in k’on phat ding a, ka Pathian aw, na thutak ka phat ding hi, Nang Israelte Mi Siangthou aw, kaihging toh nang phat in la ka sa ding.

²³Nangmah phat a la ka sak chiang in ka muk a nuam mahmah ding a; na tatsa ka hinna mah leng nuam a sa mahmah ding hi.

²⁴Ka lei in leng nitum in na diktatna thu a gen ding; ka siatna ding zongte a zahlak un a zumta uhi.