Read Paite Chin SAM 72 Bible Online

SAM 72 - Paite Chin bible

SAM 72

¹Pathian aw, na vaihawmnate kumpipa kiang ah pia inla, na diktatna kumpipa tapa kiang ah pia in.

²Na mite dikna in vai a hawmsak ding a, na mi gentheite vaihawmna dik in vai a hawmsak ding hi.

³Tanglian leh tangneute’n diktatna in mite kiang ah khamuanna a hontun ding uhi.

⁴Aman mi lak a gentheite vai a hawmsak ding a, tagah tate a hondam ding a, nuaisiahtu bel a hihzan ding hi.

⁵Tung a ni leh kha om sungteng, suan omsung teng in leng a kikou ding uhi.

⁶Amah loupa gawitan tung a vuah kia bang in a ke ding a; lei vak vuah tui bang mai in.

⁷A damlai un mi diktat a hampha ding uh, khapi om nawnlouh dong in khamuanna thupi toh a khang ding uhi.

⁸Aman tuipi apan a tuipi dang pha in, luipi apan kawlmong pha in thu a nei ding.

⁹Gamdai a omte a ma ah a kun ding ua: a melmate’n leng leivui a liak ding uhi.

¹⁰Tarsish gam leh tuikulh gam Kumpipate’n kipahman a hontawi ding ua; Sheba leh Sheba gam Kumpipate’n thilpiakte a honlan ding uhi.

¹¹Ahi, kumpipa tengteng a ma ah a khupboh ding ua: namchih teng in a na a sem ding uhi.

¹²Genthei in a sap chiang in aman a humbit ding a, mi tagah, panpihpa neilou leng a humbit ding hi.

¹³Mi genthei leh tagahte a hehpih ding a, tagahte hinna a hondam ding hi.

¹⁴A hinna uh nuaisiahna leh hiamgamna lak a kipan a tan ding a, a sisan uh amah ngaihdan in manpha tak a hi ding hi.

¹⁵Huan, a hing ding ua; Sheba gam dangkaeng a kipan a piak ahi ding a: mite’n amah a thumsak gige ding uhi; nitum in a vualzawl ding uhi.

¹⁶Lei ah, mualvum peuh ah, buh tampi a om ding a; a vui Lebanon bang in a ling suausuau ding a, khua a mite bel loupa bang in a pha lihliah ding uhi.

¹⁷A min tangtawn in a om den ding a; a min ni a om sung in tatlak lou in a om zel ding a; mite amah ah vualzawl in a om ding ua; nam chihte’n amah hampha a chi ding uhi.

¹⁸TOUPA Pathian, Israelte Pathian phat in om hen, amah kia in thillamdang a hih zel a.

¹⁹A min thupitak tangtawn in phat in leng om henla; lei pumpi leng a thupina a hihdim in om hen. Amen, Amen.

²⁰Jesse tapa David thumnate a beita hi.