Read Paite Chin SAM 73 Bible Online

SAM 73 - Paite Chin bible

SAM 73

¹Pathian Israelte tung ah a hoih ngei e, lungtang siangthoute tung ah.

²Himahleh ken zaw ka siktal dekdek a; ka kalsuante a teu dekdek ahi.

³Migilou saloute vangphat dan ka muh in mi kiuangsakte ka eng hi.

⁴A sih lai un thuakgimna a neikei ua: a hatna uh a kip zawsop hi.

⁵Midang bang a gimthuak in a omkei uhi. Midang bang a gawt in leng a omsam kei uhi.

⁶Huaiziak in kisaktheihna in khainiang bang in a ngawng uh a vial a; hiamgamna in puan bang in a tuam hi.

⁷Thau ziak in a mit uh a pawng leuluau a: lungtang thudeih sang a thupi a nei uhi.

⁸A nuihsan ua, gilou tak in nuaisiahna thu a gen ua: kisaktheihna in a pau uhi.

⁹A kam uh vanlam ah a koih ua, a lei un leitung a pha suak zel hi.

¹⁰Huaiziak in a mite huai ah a kiknawn ua, Tui nou a dim a dawn siang sipsip uhi.

¹¹Pathian in bangchi’n a thei dia? Tungnungpen in theihna a nei dia hia? a chi uhi.

¹²En dih, hiai migilou saloute ahi uh; nuamsa a om in a hau deuhdeuh uhi.

¹³A thawn in ka lungtang ka hihsiang a, ka khutte gensiatbei in ka sil hi.

¹⁴Nitum in gawt in ka om a, zingsang teng in sawi in ka om hi.

¹⁵Huchibang in ka gen ding, na chita leng; ngai dih, muanhuailou tak a hih ka hi ding.

¹⁶Huai ka theihna ding dan ka ngaihtuah in, Kei din a na lua hi.

¹⁷Pathian Mun Siangthou a ka lut a, a beina ding uh ka ngaihtuah masiah.

¹⁸Amau mun naltak ah na koih a; siatnate ah na paikhe zel hi.

¹⁹Bangchidan ahia mitphiat kal kia a inn-gam tak uh aw! Thil mulkimhuai takte a hih manthat vek in a omta uhi.

²⁰Min khanloh nung a mang bangmah a sak louh bang un, TOUPA aw, na halh hun in amau lim leng bangmah na sa kei ding hi.

²¹Ka lungsim lungkham a a om a, ka lungtang sut a ka omlai in.

²²Mi mawl leh bangmah theilou ka hi a, na lak ah gamsa bang phet ka hi hial hi.

²³Himahleh na kiang ah ka om gige a: ka khut taklam na len gige hi.

²⁴Nang na lemtheihna in n’on pi ding a, huai nung chiang in thupina ah n’on kipahpih ding hi.

²⁵Van ah nang lou kua ka nei a? Lei ah leng nang lou ngal ka deih kuamah a omkei hi.

²⁶Ka sa leh ka lungtang a bahta a: himahleh Pathian tangtawn a ka lungtang utna ding leh ka tantuan ding ahi.

²⁷Ngai in, nangmah gamlat a omte a mangthang dek ua: a hon angkawm san peuhmahte na hihmangta ahi.

²⁸Kei ading in bel Pathian naih a hoih a: TOUPA Pathian ka kihumbitna in ka nei a, nna nasep tengteng thu ka hilh theihna ding in.