Read Paite Chin SAM 74 Bible Online

SAM 74 - Paite Chin bible

SAM 74

¹Pathian aw, bangding a hon paimang den ding na hia oi? Bangding a na gantatna mun a belamte tung a na hehna a khut?

²Na mite kikhawmte, nidanglai a na lei, na gou ding a na tat namte theigige in; na omna Zion tang toh.

³Tangtawn siatna lam ah na khe khai in, melmate’n Mun Siangthou ah thil gilou chiteng a hihta uhi.

⁴Nangmah doute na mite kikhawmte lak ah a awng zuazua ua; a chiamnate uh chiamtehna ding in a takta uhi.

⁵Mi singbawk heipi a ngimte bang in a kimu ua.

⁶Tun ah a thilkhuak kilawm teng uh heita leh sek in a hihse chiat uhi.

⁷Na Mun Siangthou a hal ua; na min omna lei a tum khop hial in a hihbuahta uhi.

⁸A lungsim un, avek in i hihse ding, a chi ua, hiai gam a Pathian kikhopna in tengteng a halse khinta uhi.

⁹I kichiamtehnate uh i muta kei ua: Zawlnei a omta kei ua a sawt ding dan thei himhim i lak uah leng a omkei hi.

¹⁰Pathian aw, melma in bang tan ahia hon gensiat ding? Gal in na min tangtawn in a gense dia hia?

¹¹Bangding in ahia, na khut, na khut taklam na lak tak? Pholh khe nawn inla, amaute hihmang in.

¹²Himahleh, Pathian nidanglai tan a ka Kumpipa, lei lai tak a hotdamna siampa pen ahi.

¹³Nang na hatna in tuipi na kikhensak a, nang tui a dragonte na kitamsak hi.

¹⁴Nang Ole lute na zansak a, amah gamdai mi omte kiang ah an ding in na pia hi.

¹⁵Nang tuikhuk leh tuilian na khen a; nang lui lian taktakte na kangsak hi.

¹⁶Sun nang a ahi a, zan leng nang a ahi. Nang khovak leh nisa na ngaihtuah hi.

¹⁷Nang leitung gamgite na khung vek hi: nang nipi leh phalbi na siam ahi.

¹⁸TOUPA aw, hiai theigige in, melma in a hon gensiat a; nam haipi in na min a gensiat.

¹⁹Aw na vakhu hinna gam sahang kiang ah pe mahmah kenla; na mi gentheite hinna tangtawn in mangngilh sam ken.

²⁰Thukhun hon poimawhngaih in: leimun mial tata hiamgamna omna in a dim hi.

²¹Aw, nuaisiahna thuakte zahlak in kihei kei uhenla: genthei leh tagahte’n na min phat uhen.

²²Pathian aw, thou inla, nangmah thu kigen tawm inla, mihai in nitum in a hon gensiat dan theigige in.

²³Nangmah galte husa mangngilh ken: a hon sualte chiak vengvung a paitou gige ahi uhi.