Read Paite Chin SAM 76 Bible Online

SAM 76 - Paite Chin bible

SAM 76

¹Judahte lak ah Pathian theih in a om a; Israelte lak ah a min a thupi hi.

²Salem ah bawkta a om a. Amah omna Zion ah a om hi.

³Huai ah thalpeu thalte a hihsia a: phawte, namsaute, kidouna vanzatte toh. Selah

⁴Nang thupitak leh hoihtak na hi a, sathah tangte sang in.

⁵Lungtang phate’n loh a tuak ua, a ihmu uh a ihmu denta uhi; mi hatte leng kuamah in a khut uh a lik theita kei uhi.

⁶Jakob Pathian aw, na sawina ziak in kangtalai leh sakol leng gen ding theilou in a om tuaktuak uhi.

⁷Nang, nangmah mah, lau ding na hi: na heh peuhmah leh, kua ahia na mitmuh a ding thei ding?

⁸Na vaihawm thu van a kipan in na theisak a; lei a lau a, a daita hi.

⁹Lei a mi thunuailut tengteng hondam ding leh vaihawm ding a Pathian a thoh lai in. Selah

¹⁰Pellou in mihing hehna in nang a honphat ding a: hehna val in na kigak ding hi.

¹¹Thu chiam inla, TOUPA na Pathian lak uah hih tangtung un: a kim a mi tengteng in kihtak dingpa kipahmante hon tawisak uhen.

¹²Aman lalte kha a satkhe ding a; amah lei a kumpipate ading in a kihtakhuai ahi.