Read Paite Chin SAM 79 Bible Online

SAM 79 - Paite Chin bible

SAM 79

¹Pathian aw, namchih na gouluah ding ah a lut ua; na biakin siangthou a hihnin uhi; Jerusalem suangchim a vum uhi.

²Na sikhate luang tungleng vasate an ding in a pia ua, na misiangthoute sa gamsate kiang ah a pia ua.

³A sisan uh Jerusalem kim ah tui bang in a sungbua ua; amau vui ding lah kuamah a om ngal kei uhi.

⁴I kim ua mite gensiat in i na om ua, i kiangnai a mite muhsit leh nuihsat in i na omta uhi.

⁵TOUPA aw, bang tan ahia na heh nilouh ding? Na mullitna mei bang in a kuang ding ahia?

⁶Nangmah theilou namchih tung ah na hehna sungbua in, na min sam lou gam tung ah.

⁷Jakobte a ne khin ua; a omna uh a hihgamta uhi.

⁸Ka pipute uh thulimlouhnate ka lak uah theigige ken: na lainatna in hon don pah hen. Nakpitak a hihniam in ka omta ngal ua.

⁹Hon hondampa Pathian aw, na min thupina ding in hon panpih inla; na min ziak in hon humbit in, ka khelhnate uh sil siang in.

¹⁰Bang achia namchih in, A Pathian uh koi a om ahia leh? Na sikhate sisan pawt phulakna ka mitmuh un namchih lak ah theih hi hen.

¹¹Henta thumna na ma ah tung hen: na thilhihtheihna thupidan bangzel in si ding a sehte humbit inla:

¹²TOUPA aw, nang a hon gensiatna uh, ka kiangnai uate tung ah a leh sagih in thuk in.

¹³Huchi in, kou na mite, na gantatna mun a belamte’n, tangtawn in kipahthu k’on hilh ding uhi: suan tengteng tan in nangmah phatna ka theisak zel ding uhi.