Read Paite Chin SAM 80 Bible Online

SAM 80 - Paite Chin bible

SAM 80

¹Israelte chingpa, Belamhon bang a Joseph pipa, bil na doh in: nang cherubte tung a tu, hong vakkhia in.

²Ephraim leh Benjamin, Manasseh mitmuh in na hatna tokthou inla, hon hondam ding in hongpai in.

³Pathian aw, hon kiheisak nawn inla; na mel hihvak in, huchi in hotdam in ka om ding uhi.

⁴TOUPA aw, sepaihte Pathian, bang tan ahia na mite thumna tung a na heh ding?

⁵Amaute khitui tanghou in na vak a, khitui dawn ding in tehna liantak in na pe zel hi.

⁶Nang ka kim ua mite ading in kinakna din n’on bawl nak a: ka melmate uh a nui chiat nak uhi.

⁷Sepaihte Pathian aw, hon kiheisak nawn inla: na mel hihvak in, huchi in hotdam in ka om ding uhi.

⁸Aigupta gam a kipan grepgui na honla a: namchih na delh khia a, na suanta hi.

⁹A ma na hih siang zel a, thutak in zung a kai a, gam a luahvek hi.

¹⁰Tangte a limtuam in a om chiat, a hiangte Pathian sidar singte bang ahi.

¹¹A hiangte tuipi tan in a zamsuak sak a a selte Luipi pha in.

¹²Bang achia a huangte hihsia na hia? Lampi a pai peuhmah in a sat kheta uhi.

¹³Gamnuai a ngal in a hihsia a, gamsate’n leng a ne uhi.

¹⁴Sepaihte Pathian aw, hehpih in kihei nawn in; van a kipan in hon ensuk inla, hiai grepgui en inla, hongveh in.

¹⁵A kung na khut taklam in a suan leh, a hiang nang dia na khauhsak toh.

¹⁶Mei ah a kangta, phuk in a omta: na mel a salhna ziak in a mangthang zel hi.

¹⁷Na taklam a mi tung ah na khut om hen, mihing tapa nang dia na hihhat tung ah.

¹⁸Huchi in k’on kiksan kei ding ua: hon hihhalh inla, na min ka lou ding hi.

¹⁹TOUPA aw, sepaihte Pathian, hon kiheisak nawn inla; na mel hihvak in, huchi in hotdam in ka om ding uhi.