Read Paite Chin SAM 83 Bible Online

SAM 83 - Paite Chin bible

SAM 83

¹Pathian aw, paulou in om kenla: Pathian aw, dai nilouh ken, om maimai mahmah ken.

²Ngai in, na melmate a lum lutlut ua: nangmah hawte a dak hawkhawk uhi.

³Na mite lepchiahtak in a sawm ua, na mi selgukte tung ah a selam in a kihou a kihou khawm uhi.

⁴Kisa dih ua, a nam uh mangsak khop in i hihmang ding uh: Israel min himhim theihgige a a om nawn louhna ding in, a chi uhi.

⁵Thukhatsat in a kihou ua; na tung ah a selam a hih ding in thu a chiam khawm uhi.

⁶Edom leh Ishmael puaninte, Moab leh Haggar;

⁷Gebal leh Ammon leh Amalek; Philistiate Tura khua a omte toh:

⁸Assuriate amau lam ah a pang ua; Lot suante a panpih uhi. Selah

⁹Amau Midiante tung a na hih bang, Kison lui a Sisera tung a na hih bang, Jabin tung a na hih bang in hih sam in.

¹⁰Huai mite Endor khua ah a mang ua; lei ading in eklei banglel a na hita uhi.

¹¹A miliante uh Oreb leh Zeeb bang in bawl inla, Ahi, a kumpipa tengteng uh Zebah leh Zalmunna bang in bawl in.

¹²Huai mite’n, Pathian omnate i luahsak ding uh, a chi uhi.

¹³Ka Pathian aw, amaute leivui kipei lunglung bang in bawl in: buhsi huih mutleng bang in.

¹⁴Gam kang mei bang leh, tang kang meikuang bang in.

¹⁵Amau na huihpi in delh inla, na huih thupitak in hihlau in.

¹⁶TOUPA aw, na min a zon theihna ding un a mel uh zumna in hihdim in.

¹⁷Tangtawn in zahlak leh mangbang tak in om uhenla; ahi, hihzum a om in mangthang uhen.

¹⁸Nangmah kia Jehovah minpu, leitung tengteng tung a Tungnungpen na hi chih a theihna ding un.