Read Paite Chin SAM 84 Bible Online

SAM 84 - Paite Chin bible

SAM 84

¹Sepaihte TOUPA aw, na omnate deihhuai natel e!

²Ka hinna in TOUPA biakin huangsung intualte a ngai mahmah a, ahi, a bahpih hial a; ka lungtang leh ka sa Pathian hing kiang ah a kikou khia hi.

³Ahi, kawlgit in inn a mu a, lensiam in leng amah ading in bu a mu, a nou koihna ding in sepaihte TOUPA aw, ka Kumpipa leh ka Pathian, huai nangmah maitamte ngei ahi.

⁴Na inn a omte’n nuam a sa ua; nang a honphat gige ding uhi, Selah

⁵Nangmah a hatna nei min nuam a sa hi; a lungtang a Zion naihna lamliante om in.

⁶Kahna guam a tot un, tuikhuk omnate a bawl ua, ahi, vuahtui ke masa in vualzawlna in a khuh lel hi.

⁷Hatna a kipan in hat nawn semna ah a pai ua, Zion ah Pathian ma ah a kimusak chiat uhi.

⁸TOUPA aw, Sepaihte Pathian, ka thumna hon ngaikhia inla: Jakobte Pathian aw, bil na doh in. Selah

⁹Pathian ka phaw pen u aw, en in, na thaunilhpa mel en in.

¹⁰Na biakin huangsung intual a ni khat om tuh mun dang a ni sang khat sang in a hoihzaw hi. Gitlouhna puaninte a om sang in i Pathian inn kongkhak ngaktu hih leng ka utzaw ahi.

¹¹TOUPA Pathian i ni leh phaw ahi: TOUPA’N hehpihna leh thupina a pe ding a: diktak a omte lak ah thil hoih a it kei ding hi.

¹²Sepaihte TOUPA aw, nangmah muang min nuam a sa hi.