Read Paite Chin SAM 85 Bible Online

SAM 85 - Paite Chin bible

SAM 85

¹TOUPA, na gam tung ah na kipak a: Jakob, sal a om na pikik nawnta hi.

²Na mite thulimlouhnate na ngaidam a, a gitlouhna tengteng uh na khuh khinta hi. Selah

³Na thangpaihna tengteng na lamang a: na hehna thupitak na kiheisanta hi.

⁴Hon hondampa Pathian aw, hon kiheisak nawn inla, ka tung ua na hehna tawpsak in.

⁵Ka tung uah na heh nilouhlouh dia hia? Na hehna suan tengteng tan in na kitheisak zel dia hia?

⁶Nangmah a na mite a kipah theihna ding un n’on hihhalh nawn kei dia hia?

⁷TOUPA aw, na chitna hon musak inla, na hotdamna leng honpia in.

⁸TOUPA Pathian thugen ding ka ngaikhe ding: a mite leh a misiangthoute kiang ah khamuanna thu a gen dek a: himahleh amau haina lam ah kihei nawnta kei uhen.

⁹A hotdamna amah kihtate naih in a om ngeingei nak hi; I gam ua thupina a om theihna ding in.

¹⁰Chitna leh thutak a kituak a; diktatna leh kituahna a kitawp a,

¹¹Thutak lei a kipan in a dawnkhia a; diktatna in van apan a hon tansukta hi.

¹²Ahi, TOUPA’N thil hoih a pe ding a; I gam in leng a thilpou a pe ding hi.

¹³Diktatna in a ma a kai ding a; a khapte lampi ah a siam ding hi.