Read Paite Chin SAM 86 Bible Online

SAM 86 - Paite Chin bible

SAM 86

¹TOUPA aw, keilam ah na bil hondoh inla, hon dawng in; genthei leh tagah lua ka hi hi.

²Ka hinna vom hoih inla; Pathian limsak mi ka hi ngal a: ka Pathian aw, nangmah muang na sikha, hondam in.

³TOUPA aw, hon hehpih inla; nitum in ka honsam ngal a.

⁴Na sikha hinna hihnuam in; TOUPA aw, ka lungsim na kiang ah ka koih det ziak in.

⁵TOUPA, nang, na hoih a, ngaihdam na ngap a, a honsam peuhmah tung ah chitna na hau ngal hi.

⁶TOUPA aw, ka thumna ah na bil na doh in; hehpih k’on ngetna aw ngaikhia in.

⁷Ka mangbat ni’n k’on sam ding a, huchi in n’on dawng ding hi,

⁸TOUPA aw, pathiante lak ah nang bang himhim a omkei ua; na thilhih bang thilhih a omkei hi.

⁹TOUPA aw, na siam nam chihte a hongpai ding ua, na ma ah a kun ding ua, na min a hon pahtawi ding uhi.

¹⁰Nang na thupi ngal a, thillamdangte leng na hihzel a; nangmah kia Pathian na hi hi.

¹¹TOUPA aw, na lampi hon ensak inla, na thutak ah ka om ding a, Na min lau ding in lungtang khat hon pusak in.

¹²TOUPA ka Pathian aw, ka lungtang tengteng in k’on phat ding a; na min tangtawn in ka pahtawi ding hi.

¹³Ka tung a na chitna a thupi ziak in, ka hinna kawkhuk nuainungpen a kipan na humbitta hi.

¹⁴Pathian aw, mi kisatheite’n honsual ua, mi ngongtat omkhawmte’n ka hinna hihmang tum in a zong ua, nang a ma uah a honkoih kei uhi.

¹⁵Himahleh, TOUPA aw, nang Pathian, lainatna a dim, mi hehpihthei, lungnel, chitna leh thutak hau, na hi.

¹⁶Keilam hong nga inla, aw, hon hehpih in, na sikha kiang ah na hatna pia inla, na sikhanu tapa hondam in.

¹⁷Hoihna ding chiamtehna honlak in; hon hawte’n huai a muh ua, a zahlakna ding un, TOUPA, nang n’on panpih a, n’on khamuan ziak in.