Read Paite Chin SAM 89 Bible Online

SAM 89 - Paite Chin bible

SAM 89

¹TOUPA chitna thute tangtawn in la in ka sa ding a: ka kam in na ginomdan suan tengteng tan in ka theisak ding.

²Chitna tangtawn a ding in leptouh in a om ding a; na ginomna vante ah ngei na hihkip ding, ka chita ahi.

³Ka mitel kiang ah thu ka khung a, ka sikha David kiang ah ka kichiamta a;

⁴Na suante tangtawn a ding in ka hihkip ding a, na mangtutphah leng suan tengteng tan in ka lemding, chi in. Selah

⁵TOUPA aw, vante’n na thillamdang hih a phat ding uh; misiangthoute kikhopna ah na ginomna leng a phat ding uhi.

⁶Tung vandumte ah TOUPA toh kiteh thei ding kua a om a? Mi hattak tate lak ah TOUPA bang.

⁷Misiangthoute om khawmna ah Pathian kihtakhuai tak, a kim a mi tengteng sang a kihtakpen ding kua ahia?

⁸TOUPA sepaihte Pathian aw, nang bang a mi hat kua a om a? Na ginomna na kim ah a om ngal a.

⁹Nang tuipi kisaktheihna vai na hawm a: a tuikihawt kisep laite uh na hihdai hi.

¹⁰Nang Rahab gal thah bang in na hihkham dimdem a; nangmah galte na ban thahat in na keksakta hi.

¹¹Vante nangmah a ahi a, lei leng nangmah a ahi: khovel leh asung a omteng nangmah muhkhiak ahi.

¹²Sim leh mal nangmah siam ahi a: Tabor leh Hermon na min ziak in a nuam hi.

¹³Nang ban thilhihtheitak na nei a: na khut a hat a, na khut taklam pahtawi in a om hi.

¹⁴Diktatna leh vaihawmna dik na mangtutphah kingakna ahi a: chitna leh thutak na ma ah a pai hi.

¹⁵Husa kipahhuai za namte’n nuam a sa ua: TOUPA aw, amau na mel vak ah a vak uhi.

¹⁶Na min ziak in nitum in a nuam ua, diktatna ziak in pahtawi in a om uhi.

¹⁷Nang a hatna uh thupina na hi ngal a: na deihsakna ziak in ka ki uh pahtawi in a om ding.

¹⁸Ka phaw uh TOUPA a ahi ngal a: ka kumpipa uh Israelte Mi Siangthou ahi.

¹⁹Huailai in na misiangthoute kiang ah kilakna in thu na gen a, mi hattak khat tung ah panpihna ka nga a; mi khat mite lak a tel khiak ka pahtawita hi, chi in.

²⁰Ka sikha David ka mukheta a; ka thau siangthou in amah ka nilhta a:

²¹Ka khut a kiang ah hihkip in a om ding a; ka ban in amah a hihhat ding a, a hihhat taktak ding hi.

²²Melma in a lak ah a phut kei ding; thulimlouhna tapa in a hihgim kei ding.

²³Amah galte a ma ah ka satpuk ding a, amah hawte ka bawl ek ding.

²⁴Amah kiang ah bel ka ginomna leh ka chitna a om ding hi; ka min ziak in a ki pahtawi in a om ding hi.

²⁵A khut tuipi ah ka ngasak ding a, a khut taklam luipite ah.

²⁶Aman, Nang ka Pa, ka Pathian, ka hotdamna suangpi na hi, chi in, a honsam ding hi.

²⁷Huan, ken amah tapa masa in ka siam ding a, lei a kumpipate lak ah tungnungpen in ka bawl ding hi.

²⁸Ka chitna tangtawn in amah ading in ka kep hoih sak ding a, ka thukhun a kiang ah a om kip ding hi.

²⁹A suante tangtawn in ka omsak ding a, a mangtutphah van omlai siah in ka omsak ding hi.

³⁰A tate’n ka dan a lehngatsan ua, ka vaihawmnate bang a a omlouh ua.

³¹Ka thuseh a tatlekna a neih ua, ka thupiakte a kep hoih kei uleh.

³²A tatlek chiang in ka gawt dia, a thulimlouhnate uh zep in k’ong kan ding.

³³Himahleh, ka chitna tuin a kiang a kipan ka laksak vek kei ding a, ka ginomna zuau a suak din leng ka phal sam kei ding.

³⁴Ka thukhun ka suse kei ding a, ka muk a thupawt leng ka hihlamdang sam kei ding hi.

³⁵Khatvei ka siangthouna lou in ka kichiam a, David kiang ah zuau ka gen kei ding;

³⁶A suante tangtawn in a om ding ua, a mangtutphah ka ma ah ni bang in a om ding hi.

³⁷Kha bang in tangtawn a ding in hihkip in a om ding a, van dum a theihpih ginom bang in, a chi a. Selah

³⁸Himahleh nang na khahkhia in na deihkei a, na thau nilhpa tung ah na hehta ahi.

³⁹Na sikha thukhun na kih a: a lallukhu lei a paikhe hial in na hihniamta hi.

⁴⁰A huang tengteng na hihpuk a; a kulh pite na hihseta hi.

⁴¹Lampi a pai peuhmah in a thil a laksak zel uh.

⁴²Amah doute khut taklam na pahtawi a; a melma tengteng na hih nuamsata hi,

⁴³Ahi, a namsau ma na bengpek a, amah kisualna ah na ding kipsak kei hi.

⁴⁴A vakna na hihtawp sak a, a mangtutphah lei ah na paikheta hi.

⁴⁵A tangvallai nite uh na hihtom a; amah zahlakna in na khuhta hi. Selah

⁴⁶TOUPA aw, bang tan ahia na buk nilouh ding? Bang tan ahia na hehna mei bang a a kuan ding?

⁴⁷Aw, ka hun a tom dan theigige inla; mihing tate siam gina kei natel chia!

⁴⁸Kua mi ahia sih ni mel mulou a hing a, Sheol khut a kipan a a hinna humbit ding? Selah

⁴⁹TOUPA, nidanglai a na hehpihna, na ginomna David kiang a kichiam a na chiam, koi a om ahita a?

⁵⁰TOUPA, na sikhate a gensiatna uh theigige in; nam hattakte tengteng gensiatna ka angsung a ka thuak zeldan.

⁵¹TOUPA aw, nang hondoute gensiatna, na thaunilhpa khapte gensiatna mah,

⁵²TOUPA tangtawn in phat in om hen. Amen, Amen.