Read Paite Chin SAM 9 Bible Online

SAM 9 - Paite Chin bible

SAM 9

¹TOUPA kiang ah ka lungtang tengteng in kipahthu ka gen ding a; na thillamdang hih tengteng ka theisak ding hi;

²Nangmah ah ka kipak in ka nuam ding a: Tungnungpen aw, na min phat in la ka sa ding hi.

³Hondoute a taizak tak un, na ma ah a kipalpuk ua, a mangthang uhi;

⁴Kei adia kilawm himahleh ka thu ah nang kei n’on gum ngal a; diktak a vaihawm in mangtutphah ah na tu a.

⁵Namchih na thuhilh a, gilou saloute na hih mangthang a, a min uh leng Tangtawn tangtawn in na thaimangta hi;

⁶Doumite a mangbang vek ua, tangtawn a ding in bangmah neilou in a omta uhi; na khaw sukgamsate amaute theihgigena nangawn toh a mangthang hi.

⁷TOUPA tangtawn in kumpipa in a tu dia; a mangtutphah vaihawmna in a bawlta hi;

⁸Aman khovel kizentak in vai a hawmsak ding a, khentuam neilou in michih vai a hawm ding hi.

⁹Nuaisiahte adin TOUPA bukna ahi ding, buai hun chiang a bukna;

¹⁰Huchi in na min theite’n a honmuang ding ua; nang zaw TOUPA, nangmah honzongte na paisan ngei ngal kei hi.

¹¹TOUPA, Zion a om phat in lasa unla; mite lak ah a thilhihte hilh un;

¹²Sisan suah thu dongtel zelpa’n amau lah a theigige ngal a; mi genthei kikou aw a mangngilh ngeikei hi.

¹³TOUPA aw, hon hehpih inla; sihna kongkhak apan hon kaikhepa, hon hawte ziak a ka mangbatna en in;

¹⁴Nangmah phatna tengteng ka theih sak theihna ding in: Zion tanu kongpi ah, n’on hotdamna ah ka nuam ding hi.

¹⁵Namchih a kawkhuk bawl uah a tum ua; a guk a a len zak uah amau khe mah a awkta hi.

¹⁶TOUPA a kihilta a, vai a hawmta a: migilou salou amah khutsuak mah ah a awk hi. Higgaion. Selah

¹⁷Migilou saloute Sheol ah a kiknawn ding uh. Namchih Pathian mangngilh hatte tengteng toh;

¹⁸Tagahte mangngilh in a om nilouh louh kei ding ua, gentheite lametna tangtawn in a mang sam kei ding hi.

¹⁹TOUPA aw, thou dihve; mihing peuhmah vualzou kei hen: namchih na mitmuh ah vaihawm sak in om hen:

²⁰TOUPA aw, amau lausak in; namchih in mihing lel ahi uh chih kithei uhen. Selah