Read Paite Chin SAM 92 Bible Online

SAM 92 - Paite Chin bible

SAM 92

¹TOUPA kiang a kipahthu gen leh, Tungnungpen aw, na min phat a lasak thil hoih ahi:

²Zingsang a na chitna hihlat leh, zan teng a na ginomna hihlat,

³Thil tumtheih gui sawm neite, pekgingte, kaihging tum khasiathuaite toh, a hoih hi.

⁴TOUPA, nang nna nasep in n’on kipaksak a: na khut thilhihte ziak in nuam in la ka sa ding hi.

⁵TOUPA aw, na thilhihte thupi hina tel e! Na ngaihtuahnate a thuk na lawmlawm e!

⁶Mi mawl in hiai a theikei hi; mihai in a theisiam sam kei hi:

⁷Migilou saloute loupa bang a a hongnou ua, thil hihkhialte tengteng a hongphat letlot un, tangtawn a ding a hihman a hongom ding uh ahi, chih.

⁸TOUPA aw, nang zaw tangtawn ading a sangpi a om gige na hi.

⁹TOUPA aw, ngai dih, nang hondoute, ngai dih, nang hondoute a mangthang dek uhi; thil hihkhial tengteng hihzak in a omvek ding uhi.

¹⁰Himahleh gam bawngtal ki bang in ka ki na pahtawi a: thau thak ka nilhta hi.

¹¹Ka mit in leng ka galte tung a ka thudeih a mu dia, ka bil in kei hondou gilou saloute tung a ka thudeih a za ding.

¹²Mi diktat tumsing bang in a khanpha ding a: Lebanon tang a sidar sing bang in a khang huthut ding hi.

¹³TOUPA inn a suan a omte i Pathian biakin huangsung intual ah a khanpha ding uhi.

¹⁴Upat nung in leng a gah lailai ding ua; tui pai kiihkeih in a hing dipdip ding uhi.

¹⁵TOUPA diktat ahi chih theihsakna ding in: amah ka suangpi ahi a, amah ah diktatlouhna himhim a omkei hi.