Read Paite Chin SAM 94 Bible Online

SAM 94 - Paite Chin bible

SAM 94

¹TOUPA aw, nang phulakna thunei Pathian, nang phulakna thunei, Pathian, vakkhia in.

²Nang lei a vaihawmpa, kisa inla: kisatheite a gitlouhman uh thuk in.

³TOUPA, migilou saloute bang tan ahia, bang tan ahia a vualzoh ding uh?

⁴Amau a mawk pau ua, kisathei tak in thu a gen ua: thil hihkhialte tengteng a kiphat tawm uhi.

⁵TOUPA aw, na mite a keknen sak ua, na gouluah a hihgim uhi.

⁶Meithai leh mikhual a that ua, pa neilou a that uhi.

⁷TOUPA’N a mu kei ding, Jakob Pathian in a ngaihtuah sam kei ding, a chi uhi.

⁸Mi lak a mi mawlte aw, ngaihtuah un: mihaite aw, chikchiang in na pil ding ua?

⁹Bil phutpa’n a za kei dia hia? Mitsiampa’n a mu kei dia hia?

¹⁰Namchih thuzohpa’n na taihilh kei dia hia, mihing pilna hilhpan?

¹¹TOUPA’N mihing ngaihtuahnate bangmahlou phet ahi chih a thei a.

¹²TOUPA aw, mi na thuzoh a, na danthu apan sinmite a hampha uhi.

¹³Migilou adia kawkhuk toh a a om masiah, mangbat nite na khawlsan theihsakna din.

¹⁴TOUPA’N a mite a paikhe dek kei a, a goutan a paisan sam kei ding hi.

¹⁵Vaihawmna diktatna ah a kiknawn dia: lungtang diktak pu tengteng in huai a zui ding uhi.

¹⁶Kua ahia thil hoihlou hihte hon dousak ding a kisa ding? Thil hihkhialte hon dousak ding in kua ading dia?

¹⁷TOUPA hon panpihpa hi kei leh, ka hinna mundai ah a om pah ding hi.

¹⁸Ka khe a teu a, ka chih in, aw TOUPA, na chitna in a honkai hi.

¹⁹Ka lungsim a ngaihtuah tampi ka neih lai in, na khamuannate’n ka hinna a hihnuam zel hi.

²⁰Gitlouh satlouhna mangtutphah, dan a thilhihkhelhna omsak in, nang hon kithuahpih dia hia?

²¹Mi diktat hinna sual tum in a pungkhawm ua, sisan gensiatbei siamlouh a tangsak nak uhi.

²²Himahleh TOUPA ka insang ahi a: ka Pathian ka kihumbitna suangpi ahi.

²³A khelhna uh a tung uah a kesak a, a hoihlouhna ah a hih mangthang ding a; TOUPA i Pathian in a hihmang ding hi.