Read Paite Chin SAM 95 Bible Online

SAM 95 - Paite Chin bible

SAM 95

¹Aw hongpai un, TOUPA pahtawi in nuamsatak in la i sa ding uh: I hotdamna suangpi pahtawi in nuamsatak in i kikou ding uhi.

²Kipahthu gen in a ma ah pai ni e, phatna lasa a amah pahtawi in nuamsatak in aw i suah ding uhi.

³TOUPA Pathian a thupi mahmah ziak in, Pathian tengteng tung ah Kumpipa thupitak ahi.

⁴Amah khut ah lei mun thuktakte a om a: mualdawn sangtakte amah a mah ahi.

⁵Tuipi amah a ahi a, amah bawl ahi a; gam leng a khut suak ahi.

⁶Aw hongpai unla, bia in kun ni e: TOUPA Honsiampa ma ah i khukdin ding uh.

⁷Amah i Pathian ahi a, eite a gantatna mun a mite leh, a khut a belamte i hi ngal ua. Tuni in a aw na zak uleh,

⁸Meribah a a hih bang un na lungtang uh khauhsak kei un, Gamdai a Massah ni bang in:

⁹Huailai in na pipute un a honkhem ua, hon ze-et ua, ka thilhih a mu uhi.

¹⁰Kum sawmli sung huai suante tung ah ka lunghikei hi. A lungtang ua ngaihkhelh hatmi ahi ua, ka lampite leng a theikei uhi, ka chi a:

¹¹Huaiziak in, Ka khawlna ah a lut kei ding uh, chi in, heh in ka kichiam hi.