Read Paite Chin SAM 96 Bible Online

SAM 96 - Paite Chin bible

SAM 96

¹Aw, TOUPA phat in la thak sa unla: leitung luah tengteng aw, TOUPA phat in lasa un.

²TOUPA phat a lasa in, a min phat unla; ni teng in a hotdamna thu theisak un.

³Namchih kiang ah a thupina gen unla, michih peuhmahte kiang ah a thillamdang hihte gen un.

⁴TOUPA a thupi a, nakpitak a phat ding ahi ngal a: Pathian tengteng sang a kihtak ding ahi.

⁵Mipite pathiante milim ahi ua: TOUPA’N bel vante a bawl ahi.

⁶Pahtawina leh thupina a ma ah a om ua: hatna leh kilawmna a Mun Siangthou ah a om uhi.

⁷Mi chih a chichihte aw, TOUPA kiang ah pia unla, TOUPA kiang ah thupina leh hatna pia un.

⁸TOUPA kiang ah a min thupina pia unla: thillat ding tawi in a biakin huangsung intual ah hongpai un.

⁹Aw, siangthou kilawmna silh in TOUPA bia unla: leitung luahte teng aw, a ma ah ling un.

¹⁰Namchih lak ah, TOUPA kumpipa in a tu, chi un: Khovel mah leng a lin theihlouhna ding in, hihkip in a om hi: aman khentuam neilou in michih vai a hawm ding hi.

¹¹Vante kipaktak in om henla, lei leng nuamtak in om hen; tuipi leh asung a thil om tengteng lum honhon uhen;

¹²Lou leh asung a om tengteng kipaktak in om henla; huai hun in gam a sing teng in nuam in la a sa ding uh;

¹³TOUPA ma ah, amah a hongpai dek hi; lei vaihawm ding in a hong dek ngal a: Khovel diktak in vai a hawmsak ding a, michih thutak in vai a hawmsak ding hi.