Read Paite Chin SAM 97 Bible Online

SAM 97 - Paite Chin bible

SAM 97

¹TOUPA kumpipa in a tu a; lei nuamtak in om hen; tuikulh gam tampite kipaktak in om hen.

²Meite leh mial sah bikbek a kim ah a om a; diktatna vaihawmna dik a mangtutphah kingakna ahi.

³A ma lam ah mei a pai a, a kim a amah galte a kangmang hi.

⁴A khophiate’n khovel a salvak a: lei in a mu a, a ling hi.

⁵Tangte khuainun bang in TOUPA ma ah a zulkhin a, khovel tengteng TOUPA ma ah.

⁶Vante’n a diktatna a tangkoupih zel ua, mi khempeuh in a thupidan a muta uhi.

⁷Milim bawltawm nasemte zahlak in om uhen, milim suangte mah: nou pathian tengteng aw, amah bia un.

⁸Zion tang in a za a, kipaktak in a om a, Judah tanute leng nuamsatak in a om uh; TOUPA aw, na vaihawmte ziak in.

⁹TOUPA, nang leitung tengteng tung pek ah pahtawi in na om hi.

¹⁰TOUPA itte aw, gilou lehngatsan un: Aman misiangthoute hinna a vomhoih a; amau migilou salou khut a kipan a humbit nak hi.

¹¹Mi diktat ading in khua a vak a, lungtang diktakpu ading in kipahna a om hi.

¹²Mi diktatte aw, TOUPA ah kipaktak in om unla; A min siangthou phat un.