Read Paite Chin SAM 98 Bible Online

SAM 98 - Paite Chin bible

SAM 98

¹Aw, TOUPA pahtawi in la thak sa un; thillamdang takte a hihta ngal a: a khut taklam leh a ban siangthou in amah a ding in hotdamna a hihsakta hi.

²TOUPA’N a hotdamna a theisak a: a diktatna namchih mitmuh in chiantak in a langsakta hi.

³Israel inkuanpihte tung a a chitna leh a ginom dan a theigige a: kawlmong a mi tengteng in, I Pathian hotdamna a muta uhi.

⁴Leitung luah tengteng aw, TOUPA pahtawi in nuamsatak in kikou unla: kikou khia unla nuamsa in lasa un, ahi, phatna lasa un.

⁵Kaihging toh TOUPA phat in lasa un: kaihging leh phatna la husa toh.

⁶Pengkulte leh pengkul binei ging toh kumpipa, TOUPA ma ah, nuamsatak in kikou un.

⁷Tuipi leh asung a thil om tengteng lum honhon hen; khovel leh asung a tengteng toh:

⁸Luipite’n a khut uh beng uhenla; tangte’n nuam in lasa khawm uhen,

⁹TOUPA ma ah; lei vaihawm ding in, A hongpai dek ngal a khovel diktattakin vai a hawmsak ding a, khentuam neilou in michih vai a hawmsak ding hi.