Read Paite Chin SAM 99 Bible Online

SAM 99 - Paite Chin bible

SAM 99

¹TOUPA kumpipa in a tu a; michih ling uhen: Amah cherubte tung ah a tu a; lei ling hen.

²TOUPA Zion khaw sung ah thupitak ahi a; michihte tung ah tungnung tham ahi.

³Amau na min thupi lauhuaitak phat uhen: amah a siangthou hi.

⁴Kumpipa hatna in vaihawmna a it a; nang khentuam neihlouhna na hihkip hi, nang Jakobte lak ah vai na hawm a, diktak in na hih hi.

⁵TOUPA i Pathian uh pahtawi unla, a khe ngakna bul ah bia un: amah a siangthou hi.

⁶A siampute lak ah Mosi leh Aron, a min loute lak ah Samuel; amau TOUPA a sam ua, aman a dawngta ahi,

⁷Mei ding ah a kiang uah thu a gen a: a thu theihsakte leh thusehte a zui zel uhi.

⁸Aw TOUPA ka Pathian uh, nang amaute na dawng a: nang amau ngaidampa Pathian na hi, a thilhih tung uahte phu lazel mahle chin.

⁹TOUPA i Pathian pahtawi unla, a tang siangthou ah bia un; TOUPA i Pathian a siangthou hi.