Read Paite Chin PAUNAKTE 1 Bible Online

PAUNAKTE 1 - Paite Chin bible

PAUNAKTE 1

¹Israel kumpipa, David tapa Solomon paunakte:

²Pilna leh hilhna theihna ding; theihsiamna thute theikakna ding;

³Thilhih pilhuai a hilhna mu ding, diktatna, vaihawm leh hawmsiamna ah;

⁴Mi mawlte kiang a kivensiamna peding, tangval kiang a theihna leh ngentelna;

⁵Mi pil in a zak theih a, sinsiamna a a pun theihna ding in; theisiam mi in thuphate a phak theihna ding;

⁶Paunak leh lim a thugen theisiam ding; mipilte thute, gentehna thugen theihhakte theisiam ding in.

⁷TOUPA kihtak theihna kipatna ahi: himahleh mihai in pilna leh hilhna a musit.

⁸Ka tapa, na pa hilhna za in, na nu dan mangngilh ken:

⁹Na lu ading in deihhuai lutang zem leh na ngawng vial ding khainiangte hi ding ahi ngal a.

¹⁰Ka tapa, mikhialte’n a honzol ua leh, pha sakpih ken.

¹¹Honzui in, sisan I buk ding ua, a ziak bei in mi hoihte a guk in i tang ding uh, a chih uleh:

¹²Sheol bang in amaute a hing in i nawmvalh ding ua, huan, kawkhuk sung a paisukte bang in, a pum in:

¹³Van manpha tengteng i mu ding ua, gallakte in i innte uh i dimsak ding uh;

¹⁴Na tan kou lak ah na seplut ding a; sumbawm khat i neikhawm ding ua:

¹⁵Ka tapa, lampi ah amau toh ton ken; a lampi ua kipan na khe kaikik in:

¹⁶Gilou hih ding in a khe uh a tai ngal a, huan sisan suah ding in a kinoh uhi.

¹⁷Vasa himhim mitmuh in, len a kiphah thawn ngal a:

¹⁸Huan hiaite’n amau sisan ngei a tang ua, amau hinna ngei a guk in a buk uhi.

¹⁹Huchibang tuh michih punna a duhgawlte lampi ahi a; huai in a neitute hinna a lakmang sak sek hi.

²⁰Kongzing ah ngaihtak in pilna a kikou a; mun liante ah a aw a suah a;

²¹Mipi omkhawmte mun pipen ah a kikou a; kongpite lutna ah, khopi ah, a thute a gen:

²²Bang tan ahia, nou mi mawlte’n, mawlna na it ding uh? Nuihsanmite’n nuihsana amaute a kipah ding ua, mihaite’n theihna a huat ding uh?

²³Ka salhna ah kihei unla: ngai in na tung uah ka kha ka sung baw ding, na kiang uah ka thute ka theisak ding hi.

²⁴Ka sap a, na nial ziak un: ka bante ka zak a, kuamah in a limsak kei uh;

²⁵Himahleh ka thupha tengteng bangmahlou in na koih ua, ka salhnate bangmah na deihkei uhi:

²⁶Ken leng na tuahsiat ni un k’on nuihsan dia; na launa uh a hongtun chiang in k’on chiamnuih ding;

²⁷Huihpi bang a na launa uh a hongtun chiang in; pingpei bang a na tuahsiatna uh a hongtun chiang in; lungkhamna leh dahna na tung ua a hongtun chiang in.

²⁸Huai hun chiang in kei a honsam ding ua, himahleh ka dawng kei ding; thanuamtak in a honzong ding ua, himahleh a honmu kei ding uh:

²⁹Theihna a huat ua, TOUPA kihtakna a zon louh ziak un:

³⁰Ka thupha lak ah bangmah a deihkei ua; ka salhna tengteng a musit uhi:

³¹Huaiziak in a lampi uh gah a ne ding ua, amau thusawmte ngei in a vah ding uhi.

³²Mi mawlte nungtolhna in amaute a that dia, mihaite hauhsakna in amau hihmang ding a hih ziak in.

³³Himahleh kuapeuh kei hon ngaikhia bittak in a teng ding ua, gilou launa panglou in a muang ding uhi.