Read Paite Chin PAUNAKTE 10 Bible Online

PAUNAKTE 10 - Paite Chin bible

PAUNAKTE 10

¹Solomon paunakte. Tapa pil in pa kipak a bawl a: Himahleh tapa hai a nu gikna ahi.

²Gitlouhna sumte’n bangmah a lohtak kei: Himahleh diktatna in sihna a kipan a tankhia hi.

³TOUPA’N mi diktat kialsih a phal kei ding; Himahleh migilou a kipan a tankhia hi.

⁴Khut ze awlmi a hong genthei a: Himahleh mi thanuam khut in hauhsakna a bawl hi.

⁵Nipi lai a lakhawmpa tapa pil ahi: himahleh pawltak hun a ihmu zumhuai omsak tapa ahi.

⁶Midiktat lu tung ah vualzawlnate a om a: Himahleh gilou kam hiamgamna in a tuam hi.

⁷Midik theihgigena a nuam a: himahleh Migilou min a muat mang ding.

⁸Lungtang pilin thupiakte a sang ding a: himahleh mihai haiham a puk ding.

⁹Tangtaka pai hoihtak in a pai a: himahleh a lampite kilawmlousak theih in a om ding hi.

¹⁰A mit a chiamtehna bawl in lungkham na a omsak a; himahleh mihai haiham a puk ding.

¹¹Midiktat kam hinna tuikhuk ahi: himahleh hiamgamna in gilou kam a tuam hi.

¹²Huatna in kidouna a tokthou a, himahleh itna in tatlekna tengteng a khuh hi.

¹³Theihkak theihna neimi muk ah pilna muh in a om: himahleh chiang theihsiamna neilou mi nungzang ading ahi.

¹⁴Mipilte’n theihna a khol khawm ua: himahleh mihai kamin siatna a naih.

¹⁵Mihausa hauhsakna a khopi muanhuai ahi: mi genthei siatna a gentheih uh ahi.

¹⁶Midiktat sepgimna in hinna a zuan a; gilou punna in khelhna lam.

¹⁷Bawlhoihna limsak hinna lampi ah a om a: himahleh salhna donlou a paikhial hi.

¹⁸Huatna sel zuautheimukte a kipan ahi a; huan mi gensiatna gen mihai ahi.

¹⁹Thu tampite ah tatlekna a omlou kei a: himahleh a mukte thuzoh in piltak in a hih hi.

²⁰Midiktat lei dangka hoihpen bang ahi: migilou lungtang a thamatna neuchik ahi.

²¹Midiktat mukte’n mi tampi a vak a: himahleh mihaite theihsiamna taksap ziak in a si uh.

²²TOUPA vualzawl na in hauhsakna a bawl a, huan huai ah lungkhamna a behlap kei hi.

²³Mihai ading in gitlouhna hih kisuk halhna bang ahi: huchibang in theisiam mi ading in pilna ahi.

²⁴Migilou launa, amah tung ah a hongtung ding: midiktat deihna phal in a om ding hi.

²⁵Pingpei a lenmang bang in, migilou a om nawn kei: himahleh mi diktat tangtawn suangphum ahi.

²⁶Zuthuk in ha a suksiat bang in meikhu in mit a susia a, huchibang mah in amah sawlte ading in mi zongzaw a om hi.

²⁷TOUPA kihtakin nite a sausak a, himahleh migilou kumte hihtom ahi ding.

²⁸Midiktat lametna kipahna ahi ding, himahleh migilou lametna a mangthang ding.

²⁹TOUPA lampi a mitangte ading in kulh muanhuai ahi; himahleh migilou nasemmite ading in siatna ahi.

³⁰Midiktat suan mang ahi ngeikei ding: himahleh migilou gamsung ah a teng kei ding hi.

³¹Midiktat kamin pilna a hontun a: himahleh lei ginalou satkhiak in a om ding.

³²Midiktat mukte’n laktuak bang ahia a thei a, himahleh migilou kam in ginatlouhna a gen hi.