Read Paite Chin PAUNAKTE 11 Bible Online

PAUNAKTE 11 - Paite Chin bible

PAUNAKTE 11

¹Bukna diklou TOUPA ading in kihhuai ahi, himahleh gikdan dik a kipahpih lam ahi.

²Kisaktheihna a hongpai chiang in, zumna a hongpai; himahleh mi kiniamkhiakte kiang ah pilna a om hi.

³Mitangte dikna in amau a pi ding, himahleh mi lepchiahte hoihlouhna in amau ahihse ding hi.

⁴Thangpaih ni’n hauhsak a phatuam kei, himahleh diktatna in sihna a kipan a hunkhia hi.

⁵Mi hoihkim diktatna in a lampi a seksak dia; himahleh migilou a gitlouhna ah a puk ding hi.

⁶Mitangte diktatna in amau a suaktasak; himahleh lepchiahtak a hihte amau poikhoihna a lak in a om ding uhi.

⁷Migilou a sih chiang in, a lametna a mangthang ding: huan thulimlouhna lametna a mangthang hi.

⁸Midiktat buaina lak a kipan suahtaksak in a om a, a mun ah migilou a hongpai hi.

⁹A kam a Pathian limsaklou mi’n a inveng a hihsia a: himahleh theihna ziak in mi diktat suahtaksak in a om hi.

¹⁰Midiktat a lamzan chiang in, khopi a kipak a; gilou a manthat chiang in, kikouna a om hi.

¹¹Mitang vualzawlna ziak in khopi tawisang in a om: himahleh migilou kam a hihsiat in a om hi.

¹²Kuapeuh a inveng musit pilna bei ahi: himahleh theisiam mi a daidide hi.

¹³Tangthu genmi bang a vialvak in thuguk a taklang: himahleh lungsim muanhuai in thu a im hi.

¹⁴Kipina pil omlouhna mun ah mite a puk ua: himahleh thupha gen tampi omna ah bitna om hi.

¹⁵Kuapeuh mikhual adia a mawhkhu dia ding in na a sa ding, himahleh mawhkhu dia dinna hua a muang hi.

¹⁶Numei deihhuai in zahtakhuaina a nei gige: huan pasal hatte’n hauhsakna a nei gige hi.

¹⁷Mi chingthei in amah kha ading in a hih hoih a: himahleh migilou in amah sa a hihbuai hi.

¹⁸Migilou in loh gina sanglou a: himahleh diktatna tuh in kipahman muan a nei hi.

¹⁹Kuapeuh diktatna ading kip in hinna a tung ding: huan kuapeuh gilou delh in amah sihna ding in a hih ahi.

²⁰A lungtang ua hoihloute TOUPA ading in kihhuai ahi ua: himahleh a lampi ua hoihkimte a kipahna ahi.

²¹Khut kilen mahle uh, migilou gawtlouh in a omkei ding: himahleh diktat chi suahtaksak in a om ding hi.

²²Vok nak sung a dangkaeng suang bang in, huchibang in numei melhoih ngentel na neilou ahi.

²³Midiktat deihlam hoih kia ahi a: himahleh migilou lametna thangpaihna ahi.

²⁴A thehzak a om a, a pung semsem hi; a kilawm khenga it a om a, himahleh taksap lam a manoh lel hi.

²⁵Misiam thausak in a om ding, huan kuapeuh tuibuak amah leng tui buah in a om ding hi.

²⁶Kuapeuh buh leh bal it, mite’n amah a hamsiat ding uh: himahleh kuapeuh a zuak luzang ah vualzawlna a om ding hi.

²⁷Kuapeuh hoih thanuamtak a zong in deihsak na a zong: himahleh kuapeuh siatna zong, amah tung ah a hongtung ding hi.

²⁸Kuapeuh a hauhsak na muang a puk ding: himahleh mi diktat nah hing bang in a lun ding hi.

²⁹Kuapeuh amah in hihbuai in huih a luah ding: huan mihai lungtang pil sikha in a om ding hi.

³⁰Mi diktat gah hinna sing ahi; kuapeuh a pil in khate a man hi.

³¹Ngai in, mi diktatte lei ah thuk in a om ding. Migilou leh mikhial kinak thuksem nan chia!