Read Paite Chin PAUNAKTE 12 Bible Online

PAUNAKTE 12 - Paite Chin bible

PAUNAKTE 12

¹Kuapeuh bawlhoihna it in theih na a it hi: himahleh kuapeuh salhna hua a hai ahi.

²Mi hoih in TOUPA deihsakna a mu ding: himahleh gitlouhna ngaihtuah mipa mawh a tangsak ding.

³Gitlouhna in mi a phutkip kei ding: himahleh diktatna zung a kisuan ngeikei ding.

⁴Numei hoih a pasal ading in lallukhu ahi: himahleh zumhuai bawl nu a guhte ah muat na bang ahi.

⁵Mi diktat ngaihtuahna a dik a: himahleh migilou thute khemna ahi.

⁶Migilou thute sisan suah dia bukna ahi a: himahleh mitang kam in amau a suaktasak ding hi.

⁷Migiloute zoh in a om ua, a omkei uh: himahleh mi diktatte inn ading ding hi.

⁸Mihing a pilna bangbang a phat in a om ding: himahleh kuapeuh lungtang hoihlou muhsit in a om ding hi.

⁹Kuapeuh amah kingai thupi a, tanghou neilou mi sang in kuapeuh zahtak zeka om a sikha neimi a hoih zaw.

¹⁰Mi diktat in a gan hinna a limsak hi: himahleh migilou chitna nemte a khel mahmah hi.

¹¹Kuapeuh a gam leilet in tanghou tampi a nei ding: himahleh mi bangmahlou nungdelh mi theihsiam na bei ahi.

¹²Migilou in migiloute len a deih a: himahleh mi diktatte zung in gah a suang hi.

¹³Mukte taklekna ah migilou ading in thang a om a: himahleh mi diktat buaina a kipan a hong paikhe ding.

¹⁴A muk gah in mi hoih tai in a om ding a: huan mihing khut a hihte a kiang a piak ahi ding.

¹⁵Mihai lampi amah mit ah a dik a; himahleh kuapeuh a pil in thupha a ngaikhia hi.

¹⁶Mihai buaina tu mahmah a theih ahi: himahleh mi pilvang in zahlak na a sel hi.

¹⁷Kuapeuh thutak gen in diktat na a ensak a, himahleh palai zuau in khemna.

¹⁸Namsau sut bang a pilvanglou tak a pau a om a: himahleh mi pil lei damna ahi.

¹⁹Thutak lei tangtawn in hihkip in a om ding: himahleh lei zuauthei zaw mitphiat kal khat ading lel ahi.

²⁰Gilou thilgelte lungtang ah khemna a om: himahleh lemna thupha gente kiang ah nuam na a om hi.

²¹Mi diktatte tung ah siatna a hongtung kei dia: himahleh migilou gilou in a dim ding.

²²Muk zuautheite TOUPA ading in kihhuai ahi: himahleh diktak a hihte a kipahna ahi uh.

²³Mi pilvang in theihna a sel a: himahleh mihai lungtang in haina a phuang khia.

²⁴Mi thanuam khut in vaihawm na a paw dia: himahleh mi thadah sep ding nuai a koih in a om ding hi.

²⁵Mi lungtang gikna in a kunsak a; himahleh thu hoih in a kipaksak hi.

²⁶Mi diktat a inveng ading in pitu ahi a: himahleh migilou lampi in a maute a paikhial sak hi.

²⁷Mi thadah in a gamvakna a a matsa nangawn a em ngapkei a: himahleh mi thanuam vanneihte a manpha hi.

²⁸Diktatna lampi ah hinna a om; huai a lampi ah sih na a omkei hi.