Read Paite Chin PAUNAKTE 13 Bible Online

PAUNAKTE 13 - Paite Chin bible

PAUNAKTE 13

¹Tapa pil in a pa hilhna a za a: himahleh musittu in a salhna a zakei hi.

²Min a kam gah in hoih a ne ding hi: himahleh lepchiahmi kha in hiamgamna a ne ding hi.

³Kuapeuh a kam veng in a hinna a vom a: himahleh kuapeuh a mukte hongza in siatna a nei ding hi.

⁴Thadah kha in a deih a, bangmah a neikei: himahleh thanuam kha thausak in a om ding hi.

⁵Midiktat in zuau a hua: himahleh migilou huathuai ahia, zumna a tung sek hi.

⁶Lampi a mitang amah diktatna in a veng: himahleh mikhial zaw gitlouhna in a man hi.

⁷Amah leh amah hausa a kibawl a om, himahleh bangmah a neikei: amah leh amah genthei a kibawl a om, himahleh hauhsakna thupi a nei hi.

⁸Mihing hinna tatman a hauhsakna ahi: himahleh genthei in vaulauna a za kei hi.

⁹Mi diktat vakna a kipak a: himahleh migilou khawnvak a kithat ding.

¹⁰Kisaktheih ziak in kiselna kia a hong a: himahleh hoihtak a thuhilh pilna ahi.

¹¹Bangmahlou a hauhsakna muh a kiam ding: himahleh sepgimna ziak a lakkhawm a pung ding hi.

¹²Lametna halsawt in lungtang a china sak a: himahleh deih a hongtun chiang in, hinna sing ahi.

¹³Kuapeuh thu musit in a tung ah siatna a tun hi: himahleh kuapeuh thupiak kihta kipahman piak in a om ding.

¹⁴Mi pil dan hinna tuikhuk ahi, sihna thangte a kipan a paimangna ding.

¹⁵Theihsiamna hoih in deihsakna a pia a: himahleh lepchiah mi lampi a phok hi.

¹⁶Mi pilvang peuhmah in theihna toh in na a sem a: himahleh mihai in diklouhna a theh zak.

¹⁷Sawltak gilou hoihlou ah a puk a: himahleh palai muanhuai damna ahi.

¹⁸Gentheihna leh zumna bawlhoihna nial kiang ah a om dia: himahleh salhna limsak zahtak in a om ding.

¹⁹Deih hih pichin kha ading in a nuam a: himahleh gilou a kipan paimang mihaite ading in kihhuai ahi.

²⁰Mipilte toh ton in, huchi in na pil ding: himahleh mihaite kithuahpih in huaiziak in a thuak ding.

²¹Hoihlou in mikhialte a delh a: himahleh midiktat hoih a thuk in a om ding hi.

²²Mi hoih in gouluah a ta leh tute kiang ah a nutsiat; mikhial hauhsakna mi diktat adia kholkhawm in a om hi.

²³Genthei loukhohna ah an tampi a om: himahleh diklouhna ziak a suksiat a om hi.

²⁴Kuapeuh chiang zanglou in a tapa a mudah a: himahleh amah it in amah thanuamtak in a sawi zel hi.

²⁵Mi diktat in a kha lungkimna tan in a ne a: himahleh migilou gilpi a tasam ding.