Read Paite Chin PAUNAKTE 14 Bible Online

PAUNAKTE 14 - Paite Chin bible

PAUNAKTE 14

¹Numei pil in innte a lam a: himahleh mihai in amah khut in a phel sia.

²A tang a gamta mi’n TOUPA a kihta a: himahleh a lampite a hoihlou in amah a musit hi.

³Mihai kamsung ah kisaktheihna chiang a om: himahleh mi pil mukte’n huaite a hawi ding hi.

⁴Bawngtalte omlouhna ah, anpiakna kuang a siang a: himahleh bawngtal hatna ziak in nakpi a punna a om hi.

⁵Theihpih ginom in zuau a genkei ding: himahleh theihpih zuauthei in zuau a gen hi.

⁶Musittu in pilna a zong a, a mu kei hi: himahleh theihsiamna nei ading in theihna a baih hi.

⁷Mihai a omna ah lut in, amah ah theihna mukte na mu kei ding hi.

⁸Mi pilvang pilna a lampi theihsiam ahi a: himahleh mihaite haina khemna ahi.

⁹Mihai in khelhna a chiamnuihbawl a: himahleh mi tangte lak ah hoih deihna a om hi.

¹⁰Lungtang in amah khatna a thei a; huan mikhual in a nuamsakna a tokbuai kei hi.

¹¹Migiloute inn suksiat in a om ding: himahleh mitang biakbuk a pha ding hi.

¹²Mihing adia lampi dik a kilawm a om a, himahleh huai tawpna sihna lampite ahi.

¹³Lungtang nuihna nangawn lungkhamna ahi a; huan vualnopna tawpna gikna ahi.

¹⁴Lungtang a nungtolhmi amah lampite a dimsak in a om ding: huan mi hoih amah mah a kipan a hih lungkim in a om ding hi.

¹⁵Mi mawl in thuchih a um a: himahleh mi pilvang in a paina hoihtak in a en hi.

¹⁶Mi pil in a kihta a, gilou a kipan a paimang: himahleh mihai in musittakin a kipua a, a kimuang hi.

¹⁷Kuapeuh hehbaih haitak in a gamta ding: huan ngaihtuah giloumi huat in a om hi.

¹⁸Mimawl in haina a luah ding: himahleh mipilvang theihna khuksak in a om ding.

¹⁹Hoih mai ah hoihlou a kun a; huan diktat kongpite ah gilou a kun hi.

²⁰Genthei amah inveng mahmah muhdah in a om: himahleh hausa in lawm tampi a nei hi.

²¹A inveng musit in thil a hihkhial a: himahleh mi genthei hehpih, aman nuam a sa hi.

²²Hoihlou ngaihtuahte a paikhial kei umaw? Himahleh chitna leh thutak hoih ngaihtuah kiang ah a om ding hi.

²³Sepgimna tengteng ah phattuamna a om: himahleh mukte houlimna taksapna lam kia ah a pai hi.

²⁴Mipilte a hauhsakna ua theih in a om uhi: himahleh mihaite a haina ua theih in a om uhi.

²⁵Theihpih dik in khate a suaktasaka: himahleh zuaugen in khemna a omsak hi.

²⁶TOUPA kiktakna ah muanna hat a om a: huan a tate’n bukna mun a nei ding uh.

²⁷TOUPA kihtak hinna tuikhuk ahi, sihna thangte a kipan paimangna ding in.

²⁸Mipi tamna ah kumpipa thupina a om: himahleh mipite omlouhna lal siatna ahi.

²⁹Kuapeuh a hehhak theihsiamna thupi a kipan ahi: himahleh kuapeuh lungtom in haina a tawisang hi.

³⁰Lungtang hoih sa adia hinna ahi: himahleh hazatna guhte muatna ahi.

³¹Kuapeuh genthei nuaisiah in a Bawlpa simmawh ahi: himahleh kuapeuh tasam tung a chitna nei in amah a zahtak hi.

³²Migilou a gitlouh hihna a paihlut in a om a: himahleh mi diktat in a sihna ah lametna a nei hi.

³³Theihsiamna nei lungtang ah pilna a khawl a: himahleh mihaite sunglam pang a om kitheihsak in a om hi.

³⁴Diktatna in nam a tawisang a: himahleh khelhna mi kuapeuh ading in zahlakna ahi.

³⁵Sikha piltak a gamta lam ah kumpipa deihsakna a om a: himahleh zumna omsak tung ah a thangpaihna a om hi.