Read Paite Chin PAUNAKTE 15 Bible Online

PAUNAKTE 15 - Paite Chin bible

PAUNAKTE 15

¹Dawnna nem in thangpaihna a hei mang a: himahleh thu sia in hehna a tokthou hi.

²Mi pil lei in theihna a gen dik a: himahleh mihaite kam in haina a sungkhia hi.

³TOUPA mitte mun chiteng ah a om a, hoihlou leh hoih veng gige in.

⁴Lei damthei hinna sing ahi: himahleh huai a kilawmlouhna kha sukkhapna ahi.

⁵Mihai in a pa bawlhoihna a musit a: himahleh kuapeuh salhna limsak in pilvanna a mu hi.

⁶Midiktat inn ah gou tampi a om: himahleh migilou summuhna buaina ahi.

⁷Mi pil mukte’n theihna a phalh a: himahleh mihai lungtang in huchibang in a hih kei hi.

⁸Migilou kithoihna TOUPA ading in kihhuai ahi: himahleh mitang thumna a kipahna ahi.

⁹Migilou lampi TOUPA ading in kihhuai ahi: himahleh kuapeuh diktatna zui a it hi.

¹⁰Lampi mangngilhmi ading in bawlhoihna haksatak a om a: huan kuapeuh taihilhna mudah a si ding hi.

¹¹Sheol leh Abaddon TOUPA ma ah a om uh: mite tate lungtangte bangzah phet in a tamzaw diam aw?

¹²Musitmi’n salh a om nuam a sa kei: mi pil kiang a zuan kei ding hi.

¹³Lungtang nuam in mel kipak a bawl a: himahleh lungtang dahna ziak in lungsim a puakkham hi.

¹⁴Theihsiamna nei lungtang in theihna a zong: himahleh mihaite kam haina in a kivak hi.

¹⁵Gimthuak nite tengteng hoihlou ahi: himahleh kuapeuh lungtang kipak in Ankuangluina a nei gige hi.

¹⁶Tawmchik a hoihzaw TOUPA launa toh, huai a gou thupi leh buaina sang in.

¹⁷Itna omna a anteh louhing nekding a hoihzaw, bawngtal thau leh huai a muhdahna sang in.

¹⁸Mi thangpai in kinialna a tokthou a: himahleh kuapeuh hehhak in kinakna a damsak hi.

¹⁹Thadah lampi ling daikalh bang ahi: himahleh mitang lampi lamlian a bawl ahi.

²⁰Tapa pil in pa kipak a bawl a: himahleh mihai in a nu a musit hi.

²¹Pilna bei ading in haina nuamsakna ahi: himahleh theisiam mi’n a paina a tangsak hi.

²²Thupha omlouhna ah, thiltupte a vuaksuak: himahleh thupha gen tamna ah hihkip in a om uh.

²³A kam a dawnna ah mi’n nuamsakna a nei: huan a huntak a thugen hoih hina mah e:

²⁴Mi pil ading in hinna lampi a paitou a, nuailama Sheol a kipan a pai mang theihna ding in.

²⁵TOUPA’N kisathei inn a zungkalh khiak ding: himahleh meithai gamgi a hihkip ding.

²⁶Lunggel giloute TOUPA ading in a kihhuai a: himahleh lungsim siangthoute thugen amah kipah lam ahi.

²⁷Punna a duhgawl in amah inn a hihbuai a: himahleh kuapeuh thilpiak hua a hing ding.

²⁸Mi diktat lungtang in dawng ding in a kisin a: himahleh migilou kam in thil hoihlou a sungkhia hi.

²⁹TOUPA migilou a kipan gamla ah a om a: himahleh mi diktat thumna a za hi.

³⁰Mitte vakna in lungtang a kipaksak a: huan tanchinhoih in guhte a thausak hi.

³¹Hinna taihilhnate ngaikhia bil mipilte lak ah a om gige ding.

³²Kuapeuh bawlhoihna nial in amah kha a musit ahi: Himahleh kuapeuh taihilhna ngaikhia in theihsiamna a mu hi.

³³TOUPA kihtak pilna thuhilhna ahi; huan zahtakna ma ah kiniamkhiakna a pai hi.