Read Paite Chin PAUNAKTE 16 Bible Online

PAUNAKTE 16 - Paite Chin bible

PAUNAKTE 16

¹Lungtang kisakkholna mihing a ahi: himahleh lei dawnna TOUPA a kipan ahi.

²Mihing lampi tengteng amah mit ah a siang a: himahleh TOUPA’N khate a buk zel hi.

³TOUPA kiang ah na nasepte kemsak inla, huan na ngaihtuahnate hihkip in a om ding hi.

⁴TOUPA’N thil chiteng tawpna ding in a bawlta: ahi, gilou nangawn gilou ni ading in.

⁵Michih lungtang kisathei TOUPA ading in kihhuai ahi; thei in, gawtlouh in a omkei ding hi.

⁶Chitna leh thutak in thulimlouhna suksiang ahi: huan TOUPA kihtakna in mite hoihlou a kipan a paimang uhi.

⁷Mihing lampite’n TOUPA a suk lungkim chiang in, a melmate nangawn amah toh kilem in a bawl hi.

⁸Diktatna toh tawmchik a hoihzaw, diklouhna toh summuhna thupi sang in.

⁹Mihing lungtang in a lampi a ngaihtuah a: himahleh TOUPA’N a kalsuante a bawlsak hi.

¹⁰Kumpipa muk ah Pathian thu a om: a kam in vaihawmnate ah a talek kei ding hi.

¹¹Bukna dik leh tehna dik TOUPA a ahi uh: ip gikna tengteng a nasep ahi.

¹²Kumpipate ading in gilou hih kihhuai ahi: mangtutphah lah diktatna a hihkip ahi ngal a.

¹³Muk diktatte kumpipate kipahna ahi; huan thudik gente a it uhi.

¹⁴Kumpipa thangpaihna sihna sawltakte bang ahi: himahleh mi pil in a hih lungdam ding hi.

¹⁵Kumpipa melvakna ah hinna a om; huan a deihsakna vuah nanung meipi bang ahi.

¹⁶Pilna muh dangkaeng sang in nak hoihzawk hina e: ahi, theihsiamna muh dangka sang a telzawk ding ahi.

¹⁷Mitang lamlian hoihlou a kipan a paimang ahi: kuapeuh a lampi kem in a kha a hawi hi.

¹⁸Kisaktheihna siatna ma ah a pai a, huan lungsim kiuangsak pukna ma ah.

¹⁹Gentheite toh lungsim niamkhiak a om a hoihzaw, kisathei toh gallak hawm sang in.

²⁰Kuapeuh thu limsak in hoih a mu ding: huan kuapeuh TOUPA muang, aman nuam a sa hi.

²¹Lungtang pil pilvang a chi ding uh; huan muk khumna in sinsiamna a pungsak hi.

²²Theihsiamna neimi ading in hinna luikhuk ahi: himahleh mihaite bawlhoihna a haina uh ahi.

²³Mi pil lungtang in a kam a hilh a, huan a muk ah sinsiamna a behlap hi.

²⁴Thu kipahhuai khuaizu bang ahi, kha adia khum, guhte adia damna.

²⁵Mihing adia dik a kilawm lampi a om, himahleh huai tawpna sihna lampite ahi.

²⁶Nasem gim mi ankam limna in amah a di’n a semgim a: a gilkialna in huai a kipan a lunggulh ngal a.

²⁷Mi thulimlou in siatna a ngaihtuah: huan a muk ah meisa bang a om hi.

²⁸Mi kiuangsak in kinakna a thehzak a: huan huauhatmi in lawm bulte a khenzak hi.

²⁹Hiamgam mi’n a invengte a khem a, a hoihlou lam lampi ah a pi.

³⁰Kuapeuh a mitsi, thil hoihlou a ngaih ding ahi; kuapeuh a muk chih in hoihlou a hon tunsak nak hi.

³¹Samkang zaw thupina lallukhu ahi, diktatna lampi ah muh ahi.

³²Kuapeuh hehhak mihat sang in a hoihzaw; huan kuapeuh a lungsim thuzoh khopi laksang in.

³³Angsung ah ai a kisan a; himahleh huai a hihpaisuakna zaw TOUPA a kipan ahi.