Read Paite Chin PAUNAKTE 17 Bible Online

PAUNAKTE 17 - Paite Chin bible

PAUNAKTE 17

¹Tanghou gaw a muanna toh a hoihzaw, inn kinakna a dim sang in.

²Sikha piltak a hih in tapa zumhuaina omsak tung ah vai a hawm ding, huan unaute lak a goutanna ah tan a nei ding hi.

³Huansiangna bel dangka ading ahi, huan meipi dangkaeng ading: himahleh TOUPA’N lungtangte a endik hi.

⁴Hoihlou hihmi’n gilou mukte a limsaka; huan Zuauhatin siatna lei a bil a doh hi.

⁵Kuapeuh genthei musit in amah bawlpa a simmawh hi; huan kuapeuh tuahsiatni a kipak gawtlouh in a omkei ding hi.

⁶Naupangte’ naupangte mi upate lallukhu ahi uh; huan naupang thupina a pate uh ahi.

⁷Thugen hoih mihai toh a kilawm kei: muk zuauthei lal toh a kilawm kei sem.

⁸A nei mit ah thilpiak suangmantam bang ahi: koilam peuh a a kiheina ah, a lohching hi.

⁹Kuapeuh tatlekna khuh in itna a zong hi: himahleh kuapeuh thubuai a nuamsa in lawmte a khendalh hi.

¹⁰Theihsiamna neimi sung ah taina a lut thukzaw mihai sung a vuakna za khat sang in.

¹¹Mi hoihlou in helna kia a zong a; huaiziak in sawltak khel amah dou ding a sawl in a om ding hi.

¹²Vompi a noute laksak a om in mi tuak hen, a haina a mihai sang in.

¹³Kuapeuh hoih sik a gilou kipahman pia, a inn a kipan gilou a paimang kei ding.

¹⁴Kinakna kipatna mi’n tui a khahkhiak bang ahi: buaiziak in kinakna a omma in, kiselna paisan in.

¹⁵Kuapeuh gilou siamtangsak, kuapeuh mi diktat mawhpaih, amau gel TOUPA ading in kihhuai ahi tuaktuak uhi.

¹⁶Huaiziak in pilna lei ding in mihai khut ah a man a om ahia, theihsiamna a neikei chih thei in?

¹⁷Lawm in chiklaipeuh in a it gige a, huan vangtah ni ading in unau khat a piang hi.

¹⁸Mi theihsiamna bei in khut a beng a, invengte ma ah mawhkhu ding in a hongom hi.

¹⁹Kinakna deih in tatlekna a deih hi: kuapeuh a kongpi dom sang in siatna a zong hi.

²⁰Kuapeuh lungtang sia nei in hoih a mu kei: huan lei hoihlou nei siatna ah a puk hi.

²¹Kuapeuh mihai suang in a lungkhamna ding in a suang a; huan mihaipa’n nuamsakna a neikei hi.

²²Lungtang nuamsa damdawi hoih ahi: himahleh lungsim puakkham in guhte a keusak.

²³Migilou in a angsung a kipan in thilpiak a lakhia a, vaihawmna lampi hei koisak ding in.

²⁴Theihsiamna neimi ma ah pilna a om: himahleh mihai mitte lei tawp ah a om hi.

²⁵Tapa hai a pa ading in lungkhamna ahi a, amah piangsaknu ading in khatna ahi.

²⁶Mi diktat gawt hiam milian thutak ziak a zep leng a hoihkei hi.

²⁷Kuapeuh theihna a neimi a kamsim thei hi: kuapeuh a theihsiamna nei lungsim tawldam in a om hi.

²⁸Mihai nangawn, a daih dide lai in, pil a ngaih ahi: a mukte a chih lai in, pilvang bang a theih ahi.