Read Paite Chin PAUNAKTE 18 Bible Online

PAUNAKTE 18 - Paite Chin bible

PAUNAKTE 18

¹Kuapeuh kituamseh in amah deihlam a zong hi, huan pilna hoih tengteng tung ah a thangpai hi.

²Theihsiamna ah mihai in kipahna a neikei, himahleh a lungtang a kitaklat theihna ding ahi.

³Migilou a hong chiang in, muhsitna leng a hongpai a, Zahtaklouhna toh zumna a hongpai hi.

⁴Mihing kam thute tuithukte bang ahi; pilna tuikhuk luangte bang ahi.

⁵Migilou guptuam a hoih kei, vaihawmna a midiktat nawlkhin leng.

⁶Mihai mukte kiselna ah a lut a, huan a kam in zepna a sam hi.

⁷Mihai kam a siatna ahi, huan a mukte a kha ding a thang ahi uh.

⁸Huauhatmi thute tanghou limtak bang a hi a, gil sungnungpen pen ah a tumsuk uhi.

⁹A nasepna ze awl leng susemi ading in unau ahi.

¹⁰TOUPA min insang muanhuai ahi; mi diktat huai ah a tailut a, a bit hi.

¹¹Mi hau hauhsakna a khopi muan ahi, amah ngaihdan a kulhbang sang tak bang.

¹²Siatna ma ah mihing lungtang a kiuangsak a, zahna ma ah kiniamkhiakna a pai hi.

¹³Kuapeuh a zak ma a dawnna pia, amah ading in haina leh zumna ahi.

¹⁴Mihing lungsim in a thuakgimna a pawzou a; himahleh lungsim puakkham kuan a thuakzou ding?

¹⁵Mi pilvang lungtang in theihna a mu a; huan mi pil bil in theihna a zong hi.

¹⁶Mihing thilpiak in amah ading in omna a bawl a, huan mi thupite ma ah amah a pi hi.

¹⁷Kuapeuh a gen masa dik in a kilang phot a; himahleh invengte a hongpai a amah a zongkhia hi.

¹⁸Aisan in kiselna a tawpsak a, huan mihatte kikal ah a khen hi.

¹⁹Unau hih khasiat khopi muan sang in lak a haksa zaw: huan huchibang kiselna kulhpi sikchiangte ahi.

²⁰Mihing gilpi a kam a gah in a dim ding: a mukte punna a hih lungkim in a om ding hi.

²¹Sihna leh hinna lei thilhihtheihna ah a om; huan huai itte’n huai gah a ne ding uh.

²²Kuapeuh zi mu in thil hoih a mu a, TOUPA a kipan deihsakna a mu hi.

²³Genthei in kamdam in a khemsek a: himahleh hausa in khauhtak in a dawng hi.

²⁴Kuapeuh lawm tampite bawl in amah siatna a hih a: himahleh unau sang a ginom zaw lawm khat a om hi.