Read Paite Chin PAUNAKTE 19 Bible Online

PAUNAKTE 19 - Paite Chin bible

PAUNAKTE 19

¹Ginom a mi genthei, mihau a mukte kilawmlou gen leh mihai sang in a hoihzaw hi

²Huailou in, kha theihna bei a a om ding a hoihkei; Huan kuapeuh a khe a mangang a khialnak hi.

³Mihing haina in a lampi a hihsia a; huan a lungtang in TOUPA a hek.

⁴Hausakna in lawmte tampi a behlapa; himahleh mi genthei a lawma kipan khen in a om.

⁵Theihpih taklou gawtlouh in a omkei ding; huan kuapeuh zuaugen a suakta kei ding.

⁶Mi tampi in misiam deihsakna a ngen ding ua; huan michih thilpiakte pia ading in lawm ahi.

⁷Mi genthei unaute tengteng in amah a hua ua; amah a kipan bangchi a gamla in ahia a lawmte a pai uh! Thute in amau a delh a, himahleh a paikhin uh.

⁸Kuapeuh pilna mu in a kha a it a; kuapeuh theihsiamna kem in hoih a mu ding hi.

⁹Theihpih taklou gawtlouh in a omkei ding a; kuapeuh zuaugen a mangthang ding.

¹⁰Nuamtat, mihai ading in a kilawm kei a; sikha, lalte tung a vaihawm a kilawm kei sem hi.

¹¹Mihing ngentelna in amah a heh haksak a; huan a tatlekna paikan a thupina ahi.

¹²Kumpipa thangpaihna humpinelkai humham bang ahi; himahleh a deihsakna loupa tung a daitui bang ahi.

¹³Tapa hai a pa tuahsiatna ahi; huan zi hanhat a intung keh gige ahi.

¹⁴Inn leh hauhsaknate nu leh pate a kipan gouluah ahi: himahleh zi pil TOUPA a kipan ahi.

¹⁵Thadahna nakpi a ihmutna ah a pai a; huan mi thadahin gilkial a thuak ding.

¹⁶Kuapeuh thupiak zui in a kha a kem; himahleh kuapeuh a lampite a pilvang lou a si ding.

¹⁷Kuapeuh genthei hehpihna nei in TOUPA ading in a leitawi sak a, huan a thil hoih hih amah adin nawn ding.

¹⁸Lametna a omlai in na tapa sawi in; huan a kah ziak in na kha in khawlsan mawk ken.

¹⁹Nakpitak a thangpai min gawtna a thuak ding: amah na hutkhiak leh, huai tuh na hih kiknawn kul ding ahi ngal a.

²⁰Thupha za inla, hilhna sang in, na hinkhua nanung a na pil theihna ding in.

²¹Mihing lungtang ah thugel tampi a om a; himahleh TOUPA thuhilhna, huai mah ading ding hi.

²²Mihing deihthusam a migitna tehna ahi; huan mi genthei mizuauthei sang in a hoihzaw hi.

²³TOUPA kihtak hinna lam zotna ahi; huan kuapeuh huai nei lungkim in a om gige ding; gilou a veh in a omkei ding hi.

²⁴Mi thadah in kuangsung ah a khut a phum a, huchi in a kam ah huai a hontun nawn ngap kei hi.

²⁵Simmawhhat sat in, mi mawl in pilvang dan a sin ding; theihsiamna nei sal in, huchi in theihna a theisiam ding hi.

²⁶Kuapeuh a pa tung a hiamgam a, a nu delhmang, zumna omsak leh simmohna tun tapa ahi.

²⁷Theihna thute a kipan a lampial lel din, ka tapa, hilhna zak tawp in.

²⁸Theihpihmi phattuamna neilou in vaihawmna a simmawh: Huan migilou kam in thulimlouhna a nawmvalh hi.

²⁹Muhsit hatmi ading in vaihawmnate bawlkholhsa ahi, mihai nungzang ading in vuaknate.