Read Paite Chin PAUNAKTE 2 Bible Online

PAUNAKTE 2 - Paite Chin bible

PAUNAKTE 2

¹Ka tapa, ka thute na san a, ka thupiakte nang a na khol khawm leh;

²Huchi a pilna lam a na bil na doh a, theihsiamna lam a na lung na suk leh;

³Ahi, theihkakna na sapa, theihsiamna ding a na aw na suah leh;

⁴Dangka bang a huai na zona, gou sel bang a huai na zon leh;

⁵Huchi in TOUPA kihtakna na theisiam ding a, Pathian theihna na mu ding hi.

⁶TOUPA’N lah pilna a pe ngal a; a kam a kipan in theihna leh theihsiamna a hongpai hi.

⁷Midik ading in pilna hoih a khol khawm a, muanhuaina a omte amaute ading in lum ahi;

⁸Vaihawmna lampite a ven theihna ding in, a misiangthoute lampi a hawi theihna ding in.

⁹Huchi in diktatna leh vaihawmna na theisiam dia, huan, hawmsiamna, ahi, lampi hoih chiteng.

¹⁰Na lungtang sung ah pilna a honglut ding a, huan na kha ading in theihna a nuam ding hi;

¹¹Ngentelna in nang a honveng dia, theihsiamna in nang a honkem ding hi.

¹²Gilou lampi a kipan hon hunkhe ding, mi thil hoihlou gente a kipan;

¹³Lampi tangte mangngilh, khomial lampite a pai ding;

¹⁴Gilou hih ding a kipak a, gilou hoihlouhna a nuamsa;

¹⁵A lampite ua kawi a, a lampite ua dikloute;

¹⁶Numei lamdang a kipan nang honhun ding, mikhualnu a thute toh a maitangphatnu a kipan mahmah in;

¹⁷Aman a tuailai lawm a nusia a, a Pathian thukhun a mangngilh hi:

¹⁸A inn in sihna lampi a doh a, a lampite’n misite lampi:

¹⁹Amah kiang hoh kuamah a kiknawn kei ua, kuamah in hinna lampite a phazou sam kei uhi:

²⁰Mi hoihte lampi a na pai theih a, mi diktatte lampi na zuih theihna ding in.

²¹Mi tangte gamsung a teng ding ahi ua, huan asung ah mi hoihkimte a om tawntung ding uh.

²²Himahleh giloute gam a kipan satkhiak in a om ding ua, huan lepchiahtak a hihte huai a kipan zung kalhkhiak in a om ding uh.