Read Paite Chin PAUNAKTE 21 Bible Online

PAUNAKTE 21 - Paite Chin bible

PAUNAKTE 21

¹Kumpipa lungtang TOUPA khut a om ahi, tui lampite bang in; a utna lamlam ah a hei hi.

²Mihing lampi chiteng amah mit ah a dik a; himahleh TOUPA’N lungtangte a buk hi.

³Diktatna leh vaihawmna hih kithoihna sang in TOUPA ading in a laktak zaw hi.

⁴Mit hah sang leh, lungtang kisathei, migilou khawnvak nasan, khelhna ahi.

⁵Mi pil ngaihtuahnate’n hauhsakna lam kia a nawt a; himahleh michih kinohhat taksapna lam kia ah a kinoh hi.

⁶Lei zuauthei a gou muh tuimei lehlam lehlam a mutleng bang ahi; huaite zong min sihna a zong uhi.

⁷Migilou hiamgamna in amaute a taimang ding, vaihawmna hih a nial ziak un.

⁸Amah mawhna a dimpa lampi a kawi mahmah; himahleh misiangthou ahihleh, a thilhih a dik ahi.

⁹Inn zapi sung a numei selhat toh ten sang in, inn tung vum ning a ten a hoihzaw, in

¹⁰Migilou kha in hoihlou a deih; a invengte in a mit ah deihsakna a mu kei hi.

¹¹Muhsit hatmi gawt a a om chiang in, mi mawl bawlpil in a om hi; huan mi pil hilh a a om chiang in, theihna a mu hi.

¹²Mi diktat in migilou inkuan a ngaihtuah; migiloute amau siatna ding in vuallel a a omdan uh.

¹³Kuapeuh genthei kahna a bil hum, amah leng a kap ding, himahleh zak in a omkei ding hi.

¹⁴A guk a thilpiak in hehna a nemzou, huan angsung a vantawi in heh mahmahna.

¹⁵Mi diktat ading in vaihawmna hih kipahna ahi, himahleh thulimlou hihte ading in siatna ahi.

¹⁶Theihsiamna lampi a kipan vakmangmi misite kikhopna ah a khawl ding.

¹⁷Kuapeuh nopbawlna it mi genthei ahi ding; kuapeuh uain leh sathau hai a hau kei ding uh.

¹⁸Migilou midiktat ading in tatnasum ahia, huan mi lepchiah mitang mun ah a hongpai hi.

¹⁹Gamkeu a ten a hoihzaw, numei kiselhat leh kinak hat kiang sang in.

²⁰Mi pil tenna ah gou leh sathau manpha a om; himahleh mihai inn huai a nawmvalh vek hi.

²¹Kuapeuh diktatna leh chitna delh in hinna, diktatna leh zahtakhuaina a mu ding hi.

²²Mi pil mihatte khopi ah a kah a, huailai a muanna hatna a phel hi.

²³Kuapeuh kamsima, paulou in buainate a kipan a kha a kem hoih hi.

²⁴Mi kisathei leh uang, a min muhsit hat ahi, kisaktheihna leh kiotsakna in thil a hih zel hi.

²⁵Thadahmi deih in amah a that a; a khutte’n sepgim a nial ngal uh.

²⁶Nitum a duhgawl tak a huaiham a om a; himahleh midiktat in a pia a, a itkei hi.

²⁷Migilou kithoihna kihhuai ahi, lungsim gilou toh huai a hontawi chiang in, bangchi phet a kihhuai sem ahi diam aw!

²⁸Theihpih zuauthei a mangthang ding; himahleh a za min kalh vuallouh in thu a gen ding.

²⁹Migilou in a maitang a taksak a himahleh mitang ahihleh bel, a lampite a bawlhoih hi.

³⁰TOUPA kalh in pilna hiam theihsiamna hiam thupha hiam a omkei hi.

³¹Kidou ni ading in sakol bawlsa ahi; himahleh Vualzohna TOUPA a ahi.