Read Paite Chin PAUNAKTE 22 Bible Online

PAUNAKTE 22 - Paite Chin bible

PAUNAKTE 22

¹Hauhsakna thupite sang in min hoih telzawk ding ahi, dangka leh dangkaeng sang in deihsakna a ithuai zaw hi.

²Hausa leh genthei a kituak khawm ua, amaute bawl TOUPA ahi.

³Mi pilvang in hoihlou a mu a, a kibu hi. Himahleh mi mawl in a phuzel a, a thuakloh hi.

⁴Kiniamkhiakna leh TOUPA kihtakna lohtak hauhsaknate, zahtakhuaina leh hinna ahi.

⁵Lingte leh thangte mi hoihlou lampi ah a om: kuapeuh a kha kem in huaite a gamlat ding hi.

⁶A paina ding lampi ah naupang chil in, huan a upat hun nangawn in leng huai a kipan a paimang kei ding hi.

⁷Mihau in genthei tung ah vai a hawm a, huan leitawimi leitawisakmi ading in sikha ahi.

⁸Kuapeuh thulimlouhna tuh in tuahsia a la ding: huan a hehna chiang a lohching kei ding.

⁹Kuapeuh khuttawi lian mitnei vualzawl in a om ding: mi genthei kiang a a tanghou a kipan a piak ziak in.

¹⁰Muhsit hatmi delhkhia in, huan kinakna a paikhe ding hi: ahi, kisualna leh zumhuaina a tawp ding hi.

¹¹Kuapeuh lungtang siangthouna it, a mukte deihhuaina ziak in kumpipa a lawm ahi ding hi.

¹²Theihna nei amah TOUPA mit in a vom hoih ding, himahleh lepchiah mi thute a pai ahi.

¹³Thadah in, pawlam ah humpinelkai a om: kongzing ah thah in a om ding, a chi.

¹⁴Numei lamdangte kam kawkhuk thuk ahi: kuapeuh TOUPA deihloumi huai ah a kelut ding hi.

¹⁵Haina naupang lungtang sung ah henlop in a om a: himahleh bawldikna chiang in amah a kipan gamlapi ah a delhkhe ding hi.

¹⁶Kuapeuh a punna khansakna dia mi genthei nuaisiah a, kuapeuh mi hau kiang a pia, taksapna a tung lel hi.

¹⁷Na bildoh inla, mi pil thute za in, huan ka theihna lam ah na lungtang suk in.

¹⁸Na sung a na kep leh thil nuam ahi ngal a, na muk a hihkip khawm a a om leh.

¹⁹Na muanna TOUPA ah a hih theihna ding in, tuni in na kiang ah, nang mahmah kiang ah ka theisak hi.

²⁰Thuphate leh theihna tungtang a thil hoih penpente na kiang ah ka gelhkhinta kei maw.

²¹Na kiang a thu hondongte thutak a na dawn theihna ding a, thutak leh muanhuaite nang hon theisak hilou ka hiam?

²²A gentheih ziak in, genthei lok ken, kongpi ah gimthuak leng nuaisiah sam ken.

²³TOUPA’N lah a thu uh a gen sin ngal a, amau lokte hinna a lok ding hi.

²⁴Mi heh mi toh kizawl kenla, huan thangpaihhatmi toh kithuah ken.

²⁵A lampite na sin kha dia, na kha ading in thang na mu kha ding hi.

²⁶Khutbengte lak a khat hikenla, ahihkeileh leibate ziak a mawhkhu a pangte lak a leng hi sam ken.

²⁷Piak ding na neih kei leh, bangding a na nuai a kipan na lupna lamang ding ahia?

²⁸Na pipute koihkipsa, tang a gamgi suan ken.

²⁹A nasep a kizen mi na mu hia? Kumpipate ma ah ading ding a: mi thulimloute ma ah ading kei ding hi.