Read Paite Chin PAUNAKTE 23 Bible Online

PAUNAKTE 23 - Paite Chin bible

PAUNAKTE 23

¹Vaihawmmi toh ne ding a na tut chiang in, na ma a om amah hoihtak in ngaihtuah in.

²Huan anhaimi na hihleh, na gawl ah temta koih ding na hi.

³A anlimte duh lawken; an khemna a dim ahi chih thei in.

⁴Hausa ding in kigimsak ken; nangmah pilna a kipan tawp in.

⁵A omloupi tung ah na mit na koih ding maw? Hauhsaknate’n lah amau ading in kha a kibawl ngal ua, vanlam zuan a leng muvanlai bang in.

⁶Mi sumchit neih tanghou ne ken, a anlimte leng duh sam ken.

⁷Amah a kisim bang in, huchibang ahi: Ne inla dawn in, na kiang ah a chi a; himahleh a lungtang nang kiang ah a omkei hi.

⁸Na an nek na lawkhe ding a, na thu hoihte na mansuah ding.

⁹Mihai bil ah thugen ken, na thute pilna lah musit ding ahi ngal a.

¹⁰Tang a gamgi suan ken; pa neilou lou ah lut ken:

¹¹Amaute tanpa lah a hat ngal a; na siatna ding in amau thu a gensak ding hi.

¹²Na lungtang hilhna lam ah suk inla, na bilte theihna thute lam ah.

¹³Naupang lak a bawlhoihna it ken. Chiang in sat lechin leng a si kei ding hi.

¹⁴Chiang in amah na sat ding a, huan Sheol a kipan a kha na suakta sak ding hi.

¹⁵Ka tapa, na lungtang a pil leh, kei mahmah, ka lungtang a kipak ding:

¹⁶Ahi, ka lungtang in nuam a sa ding a, na mukte’n thil dik a gen chiang un.

¹⁷Na lungtang in mikhialte eng kei hen; himahleh nitum in TOUPA kihtakna ah om in:

¹⁸Kipahman lah a omtaktak ngal a; huchi in na lametna satkhiak ahi kei ding.

¹⁹Za in, ka tapa pil in, huchi in lampi ah na lungtang pi in.

²⁰Uain haite la kah om ken; sa haite lak ah:

²¹Zukhamhat leh anhai genthei ding uh ahi ngal a: huan ihmut haina in puansia in mi tuam ding hi.

²²Nang honsuang na pa thu ngaikhia inla, a upat chiang in na nu musit ken.

²³Thutak lei inla, zuak ken; ahi, pilna, hilhna leh theihsiamna.

²⁴Mi diktat pa nakpitak in a kipak ding: huan kuapeuh tapa pil suang in amah a kipan nuamsakna a nei ding hi.

²⁵Na nu leh na pa kipaksak inla, nang hon suangnu nuamsa sak in.

²⁶Ka tapa, na lungtang honpia inla, na mitte ka lampite ah kipak uhen.

²⁷Kizuak lah guam thukpi ahi ngal a; huan numei lamdang kawkhuk kawchik ahi.

²⁸Ahi, suamhatmi bang in a buk a, huan mite lak ah lepchiahna a pungsak hi.

²⁹Tunggikna kuan a nei a? Lungkhamna kuan a nei a? Kinaknate kuan a nei a? Phunna kuan a nei a? A kullou liamnate kuan a nei a? Mit sanna kuan a nei a?

³⁰Uain a peng opte’n; uain lehbulh zong dia kuante in.

³¹A san lai in uain en ken, nou sung a a zia a suahlai in, nemtak a a paisuklai in.

³²Atawp chiang in gulpi bang in a kei a, guldekpak bang in gu in a zen hi.

³³Na mitte’n thil lamdangte a mu ding a, na lungtang in thilhoihloute a genkhe ding hi.

³⁴Ahi, tuipilai a lum ahihkeileh longkhuam dawn a lum bang na hi ding hi.

³⁵A honsat ua, na ka sa kei; a honvua ua, bangmah in ka veikei; chikchiang in ka halh dia? Zong thaknawn naveng, na chi ding.