Read Paite Chin PAUNAKTE 25 Bible Online

PAUNAKTE 25 - Paite Chin bible

PAUNAKTE 25

¹Judah kumpipa Hezekiah mite’n a teikhiak uh, hiaite leng Solomon paunakte ahi uh.

²Thil im Pathian thupina ahi: himahleh thu zonkhiak kumpite thupina ahi.

³Van sandan, huan lei thukdan, huan kumpipate lungtang zonkhiak theih ahi kei hi.

⁴Dangka a kipan tuiek lamang in, huan siangsakmi ading in tuium-belsuan a hong omkhe ding:

⁵Kumpipa ma a kipan gilou lamang in, huan a mangtutphah diktatna a hihkip ahi ding hi.

⁶Kumpipa ma ah malam sang ah om ken, huan mi thupite omna mun ah ding ken:

⁷Hiailam ah hong paitou in, na kiang a a honchih uh a hoihzaw; na mitte’n a muhsa uh, lal ma a koih niam a na om sang in.

⁸Sual ding in man gang in kuan khepah ken, a tawp in bang hih ding ahia chih na theikei kha ding.

⁹Na inveng toh kal thu amau toh genkhawm un, huan midang thugukte pholhsuah ken!

¹⁰Huai za in nang a honkou kha dia, na zahlakna a kiheimang kei kha ding hi.

¹¹Kituak tak a thu khat gen dangka sengsunga dangkaeng apple theite bang ahi.

¹²Thumangmi bilah taihilh mi pil dangkaeng bilbah leh dangkaeng hoih chi khi bang ahi.

¹³Pawltak huan vukvot bang in, huchi in sawltak ginom amah sawlte ading in ahi; a pute kha a hihhalh ngal hi.

¹⁴Vuah pailou meipite leh huih bang in, huchi in kuapeuh dikloutak a a thilpiakte a kiuangsak ahi hi.

¹⁵Dohtheih mahmahna in vaihawmpa thuzoh ahi, huan lei nem in guh a hihtan ding hi.

¹⁶Khuaizu na muta hia? Nang adia hun lel ne in: huchilou in zaw na vah ding a, na law kha ding hi.

¹⁷Na inveng inn ah hoh vang in; huchilou in zaw a hon chimtakin a hon mudah kha ding hi.

¹⁸A inveng siatna dia zuaugen khetbuk, namsau leh thal hiam bang ahi.

¹⁹Buai hun a mi ginomlou muanzaw ha kisia, leh khepek guh kilawi bang ahi.

²⁰Mi lunggim kiang a lasa tuh khovot lai a puansilh suah bang leh zu leh tangal hel bang ahi.

²¹Na melma a gil a kial leh nekding tanghou pia inla; huan a dang a tak leh, dawn ding tui pia in:

²²A lu tung a mei am sekkhawm lah na hi ngal a, huan TOUPA’N kipahman nang a honpe ding hi.

²³Mal huih in vuah a hon zusak paha; huchibang in migensiatna lei in hehmel a bawl hi.

²⁴inn tung ning a ten, inn sung za a kiselhat numei toh tenkhawm sang in a hoihzaw hi.

²⁵Kha dangtak adia tui votte bang in, gam gamla apan tanchinhoih ahi.

²⁶Mi diktat migilou in a lam pialsak tuh tuikhuk suknit leh tuinak hihsiat bang ahi.

²⁷Khuaizu tampi nek a hoih kei: huchi mah bang in mite ding in amau thupina zonkhiak thupina ahi kei.

²⁸Amah a lungsim thuzohna bei khopi chimsa leh bang neilou bang ahi.