Read Paite Chin PAUNAKTE 26 Bible Online

PAUNAKTE 26 - Paite Chin bible

PAUNAKTE 26

¹Nipi lai a vuk bang leh, pawltaklai a vuah bang in, zahtakhuaina mihai ading in a kilawm kei hi.

²Kawlgit a vakvai bang in, phialphiah a lenlai bang in, huchi mah bang in hamsia bulbal neilou a tangtung kei hi.

³Zepna sakol ading, kamkaihna sabiltung ading, huan chiang mihaite nungzang ading ahi.

⁴Mihai a haina dungzui in dawng ken, huchilou in zaw nang leng amah na bang kha ding.

⁵Mihai a haina bang in dawng in, amah kideihna ah a pilsak kha ding hi.

⁶Kuapeuh mihai khut a thukhak in amah khete a tankhia a, siatna ding a dawn hi.

⁷Khebai khete a kikhai nelnel: huai bangmah in mihaite kam sung a gentehna ahi.

⁸Mihai kiang a zahna piak zaw suanglotna khau a suang gakkhawm bang ahi.

⁹Zukhamhat khut a loulingnei bang in, huai bangmah in mihaite kam sung a gentehna ahi.

¹⁰Mihai leh mi vialvak guaimi, thalkapsiam midang liamsak zelmi bang ahi.

¹¹Ui amah luak lam a kiknawn bang in, huai bangmah in a haina sunzom mihai ahi.

¹²Amah kideihna a pil mi na mu hia? Amah apan sang in mihai a kipan lametna a omzaw hi.

¹³Thadah in, Lampi ah humpinelkai a om; humpinelkai kongzing ah a om, a chi.

¹⁴Kongkhak a kopza ah a kiheizel bang in, thadaha lupna tung ah a om hi.

¹⁵Thadah in kuangsung ah a khut a thuna; a kam a tun nawn ngapkei hi.

¹⁶Thadah amah kideihna ah a san pethei ding mi sagih sang in pil a kisa zaw hi.

¹⁷Kuapeuh paisuak a, amah a hilou kinakna a kihihbuai, ui a bil a man bang ahi.

¹⁸Mihai in mei ekte, thal leh sihna viallot bang in;

¹⁹mi invengte khem a, chiamnui ka hi ka hia? chi toh a kibang hi.

²⁰Sing taksap ziak in mei a mit a: huan huauhatmi omlouhna ah, kinakna a bei hi.

²¹Suangkuangtheite meisumsa ading bang in leh sing mei ading bang in: kinak hat mi kilanna uangsak ahi.

²²Huauhatmi thute an limtak bang ahi, huan gilpi sungnungpen ah a tumsuk hi.

²³Leibel limlang tui a luan bang in lungtang gilou muk a zol in a nal!

²⁴Mi huauhat in a muk in a thehdalh a, a lungtang in khemna a pai.

²⁵Kilawmna thu a gen chiang in, amah um ken; a lungtang ah lah kihhuai sagih a om ngal:

²⁶A huatna zekhemna in kituam mahleh, khawmpite ma ah tangpi muh in a gitlouhna etsak ahi ding hi.

²⁷Kuapeuh khuk tou huai ah a ke ding: huan kuapeuh suang khuk, amah tung ah hong kileh ding hi.

²⁸Lei zuauthei in a hihliamsate a mudah a, maitangphat hat kam in siatna a bawl hi.